愛回家︱「Philip仔」梁禹勤專注學業 宣布離開劇組網民感不捨

TVB處境劇《愛·回家之開心速遞》劇情輕鬆搞笑又溫馨，深得觀眾喜愛。唔少劇中演員演得非常出色，更成功憑劇中角色成功入屋，當中包括飾演「Philip仔」宋飛立嘅梁禹勤。噚日（20日）佢喺IG發文宣布離開劇組，唔少網民留言表示不捨。

《愛·回家之開心速遞》噚晚播出嗰集以「青春的黑洞」為主題，講述Philip仔（梁禹勤飾）唔經唔覺已經踏入青春期，唔再與爸爸送水輝（許家傑飾）及媽媽大小姐（林淑敏飾）糖黐豆，仲對佢哋不揪不睬，就算父母點氹佢出房門都冇用，佢只係留喺房間玩遊戲機同溫習功課，令到父母擔心不已。之後佢哋就去探訪Philip仔同學技安（黃厚仁飾）屋企，點知情況都係一樣。後來，佢哋得到KC（歐瑞偉飾）嘅提醒，原來佢哋青春期嘅時候都係咁，所以二人先至接受個仔踏入青春期，及希望反叛期可以盡快過去。

呢一集出街後，梁禹勤嘅媽媽喺IG上載囝囝與林淑敏、許家傑嘅合照，並留言道別話：「多謝爸爸媽媽六年來的照顧和關懷，我入黑洞了，拜拜#愛回家之開心速遞 #大小姐#宋總監 #宋飛立#宋氏一家 #青春的黑泂」。梁媽媽喺接受傳媒訪問時就承認囝囝離開劇組，原因係要準備升中學，要專注學業。另外，佢仲話囝囝慢慢長大，性格變得內向低調，可能唔係好啱做演員，不過如果劇組有需要都唔介意客串。

戲內爸爸許家傑亦有喺社交網站上載合照，並留言話：「一家三口 永遠愛護你 就算你由bb仔到而家已經型仔過我 我都當你係我既（嘅） philp bb #loveyouasalways #愛回家之開心速遞 #招牌冷面笑匠」。

唔少網民得知Philip仔要離開劇組後，紛紛留言表示不捨及叫佢加油，例如「Oh 唔捨得Philip仔」、「由細睇到你大，bye bye Philip仔」、「希望可以得閒返嚟客串下」、「Philip仔 加油呀 好想快啲睇到你再出現愛回家」、「好唔捨得Philip仔呀」、「好唔捨得Philip仔呀 希望Dylan學業進步，以後多啲返嚟客串愛回家！」及「唔好走呀」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！