愛回家︱炎明熹驚喜客串 「技蘭」黃厚仁勁搶鏡 網民：人肉彈床嗰幕真係笑到肚痛

TVB處境劇《愛·回家之開心速遞》劇情輕鬆搞笑又溫馨，間唔中仲有特別客串嘅角色。去到噚晚（26日），劇集以「兩小無猜戀錯咗」為標題，除咗搵嚟炎明熹（Gigi）驚喜客串之外，繼續發揮玩嘢本色，飾演技蘭嘅黃厚仁非常搶眼，成功吸引唔少網民支持。

噚晚劇情講到Philip仔（梁禹勤飾）和技蘭（黃厚仁飾）都係「Gi炎粉」，佢哋前往新威龍廣場參加炎明熹粉絲見面會，為咗得到偶像簽名，技蘭不惜借出肚腩俾Philip仔當彈床，飛到Gigi面前索取簽名。Philip仔同技蘭因為Gigi嘅關係成為好朋友，佢哋仲不時傾電話同去追星，搞到媽媽錢栖（蔣家旻飾）和繼母「大小姐」龍力蓮（林淑敏飾）誤以為佢哋拍拖，仲好搞笑咁以為佢哋上郵輪「私奔」，於是兩位媽媽更坐直昇機上船搵仔，點知原來一場誤會，兩個小朋友只係上船睇Gigi演出。

呢集出街後，唔少網民除咗留言大讚Gigi可愛及好好睇之外，飾演技蘭嘅黃厚仁同時獲得網民高度關注，留言大讚佢好搶鏡、好搞笑及好可愛，例如「今集好好笑，技蘭嘅肚腩好圓 Gigi好可愛喔！Phillip 仔跳技蘭個人肉彈床果（嗰）幕真係笑到肚痛！」、「Philip 同技哥好好笑」、「人肉彈床，劇情幾搞笑喎」、「希望技安/技蘭會多啲係宋家出現，今晚個組合好好睇」、「技蘭好搞笑好搶鏡，雖然我全程都只睇Gigi ～」、「技蘭好正，呢個角色好有發展空間」、「肥仔好Q，搶曬鏡」、「飾演技安/技蘭的小演員黃厚仁很可愛」、「技蘭好搞笑和可愛」及「今集主角係技蘭！」等等。

黃厚仁媽媽接受傳媒電話訪問，表示12歲嘅黃厚仁原來已經飾演技安6年。被問到小朋友一人分飾兩角，有冇抗拒男扮女裝，黃媽媽就表示仔仔鍾意扮演技安多啲，不過佢明白做演員咩角色都要做，所以佢唔介意扮女仔。另外，黃媽媽仲有提及仔仔講過長大後想做演員，佢現時嘅戲份唔算多，而拍攝嘅時間亦多數係假期，所以唔會影響佢嘅學業。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！