戶外Chill一Chill!5大露天餐廳推薦

冬天涼涼地,最啱係約埋朋友去露天餐廳一齊食下飯,享受吓戶外嘅空氣!今期介紹5間有露天座位嘅餐廳畀大家,有傳統西餐、日式西餐、日式串燒小店同美式海鮮酒吧,新一年一於食好啲~

尖沙咀海傍扒房 Harbourside Grill 

可以欣賞無敵維港海景嘅西餐廳,室外座位空間好大,坐喺度食飯真係好舒服~餐廳主要以燒烤菜式為主,同時糅合新派法國烹調技藝,啱晒咁多位食肉獸。必叫有各種牛扒類,餐廳致力搜羅嚟自美國、阿根廷、日本、英國等多個國家嘅肉扒,有乾式熟成都有濕式熟成。仲引入西班牙頂級烤爐同埋日本木炭,燒出嚟肉質鮮嫩又多肉汁,面頭嘅辣椒牛油更有畫龍點睛嘅效果!另外佢地都有2、3、4 Courses Menu,以呢個景同地區嚟講價錢好抵食!

圖: mifoodie
圖: mifoodie

西日Fusion菜 Peko Peko Eatery 

一間健康主題多國菜,以木系及白色為主調,擺放咗唔同綠色植物作點綴,環境寫意舒適,餐廳設有數十個戶外座位,室內食客都可以透過大玻璃窗欣賞海景,好Chill呀~食物選擇都幾多元化,有超吸睛嘅Salad同慢煮菜式,如蟹肉牛油果船,以牛油果做船仔上面放上滿滿蟹肉,清新開胃。慢煮和風醬油八爪魚都幾有特色,好入味但又唔會因為慢煮而太腍,有返應有口感。

圖: erie wong
圖: erie wong

地中海小餐廳 Breeze Bistro 

位於寫意小區堅尼地城嘅地中海小餐館,以藍白為主色調,座落於海旁邊,可以喺慵懶嘅氛圍下品嚐正宗且地道嘅地中海料理,黃昏更可同時欣賞海景同晚霞。推介酥脆培根豬肉卷,係一款傳統地中海烤料理,先將五花肉、煙肉同多種香料捆成卷狀,以慢火烤香,外皮好酥脆又保留到肉汁,散發異國風味。西西里茄子燉菜都係地道家常菜,加入茄子、小番茄、洋蔥、燈籠椒、橄欖等配菜,將其切粒再加入調味料燜煮,酸甜可口配麵包食最啱。

高質日式串燒小店 仟穆

隱身於上環摩羅上街嘅日式串燒店,細細地可容納24人,半露天座位可飽覽周邊充滿藝術氛圍同古董嘅社區添~串燒種類好多,雞、豬、牛、羊、時令海鮮同蔬菜都有。「從喙到尾」全體雞套餐好有誠意,包括雞冠、雞掌心、雞腳筋、雞尾、免治雞肉棒等好多出面食唔到嘅部位,連骨頭都用嚟熬煮8小時製成濃厚雞湯!餐廳更罕有供應和牛內臟,唔知食咩嘅都可以試廚師精選八式串燒套餐㗎。

美式海鮮酒吧 TOP TOWN

好摩登嘅美式海鮮酒吧,猶如將經典美國小說《大亨小傳》場景搬到嚟香港嘅商業區,餐廳設室內及室外用餐區,無論內外都可以全角度欣賞到中環鬧市嘅五光十色!推介菜式包括鮮蝦薄片,以扇貝熬製嘅醬汁配刺身級鮮蝦片,伴埋柚子沙律,超鮮味~另外當然唔少得經典菜式龍蝦牛扒,燒和牛西冷配以波士頓龍蝦尾配千層馬鈴薯,牛扒肉味超濃。最後有以橙味朱古力慕斯、芝士蛋糕、布朗尼蛋糕及法式焦糖燉蛋組成嘅甜品塔作句號!

文: Yanica