《把關者們》雙雄爭鋒 袁偉豪搶「暖流」 陳家樂轉性趕客

袁偉豪在職場展現才能,私下則是住家男,無可挑剔。
袁偉豪在職場展現才能,私下則是住家男,無可挑剔。

袁偉豪與陳家樂因合作成為好友,2人劇中各走極端,袁偉豪化身暖男周旋在黃智雯與王敏奕之間,可謂艷福無邊,相反高傲的家樂惹人討厭,幸最終覓得知音劉佩玥。

袁偉豪(Ben)、陳家樂、黃智雯及王敏奕等主演的無綫新劇《把關者們》將於明晚(13日)晚上9時30分於翡翠台首播。這部描述海關人員工作日常的劇集,務求將劇中角色營造到貼地及生活化,令觀眾追看時增添親切感。

與黃智雯終成眷屬

今次監製關樹明找來兩大型男Ben與家樂「一較高下」吸納粉絲,不過角色營造上卻各走極端。Ben被編審刻意塑造成暖男,更首度在螢幕上與黃智雯「開花結果」,他表示:「今次我幫自己變身成Oppa,因為上年接劇已經計劃11月結婚,拍《刑偵日記》同《兩個小生去camping》已經曬到好黑,加上疫情冇乜點出街做運動,都知被批評『走樣』,所以就刻意改造自己,開工每日只帶紫薯醫肚,希望畀到觀眾全新嘅感覺,靚仔番少少。」

今次Ben會化身萬人迷,擔任高級海關要員的他不但獲下屬尊敬,更有不少異性羨慕黃智雯覓得完美的如意郎君:「因為角色對人好好,甚至識煮飯同做家務。後來因為幫過王敏奕而獲得對方青睞,不過佢話明自己唔係嚟『搶嘢』。今次我終於同智雯結為夫婦,粉絲知道呢個消息都好高興!」

劇情交代黃智雯與袁偉豪拍拖多年,由同居到結為夫婦,再攜手面對非常難過的關口,她說:「我哋一齊面對痛心嘅經歷,有場戲講我哋情緒崩潰,我係喊到導演叫咗停機都繼續喺度喊,將所有情緒發洩晒出嚟。我要多謝袁偉豪,佢係我最熟悉嘅拍檔,有佢嘅陪伴就好有安全感,平日開工我哋成日打打鬧鬧,大家嘅默契唔需要多講喇!」

學院開工似受訓

至於暖男形象深入民心的陳家樂今次顛覆一切,劇情交代考入海關的他起初相當自傲,不喜歡與「蠢人」打交道,我行我素,令同輩相當厭煩,家樂笑說:「我嘅角色覺得自己可以一個人完成任務,又嫌拍檔劉佩玥師奶仔,但後來發現對方有好多優點係自己冇嘅,大家變得啱傾。」

他形容今次開工「好開心」:「我哋每個周末都會去海關學院開工,感覺真係好似受訓一樣,大家好團結,我比較重視步操環節,所以即使拍到幾攰,都會發起大家繼續練習,出嚟嘅效果唔錯。」家樂與Ben是首次合作,起初亦見隔膜,後來成功打開話匣子,上至音樂、下至無聊八卦事亦講到滔滔不絕,Ben對這位「細佬」更是十分欣賞!

陳家樂高傲自滿,嫌棄蠢人。
陳家樂高傲自滿,嫌棄蠢人。
《把》劇演員在海關學院開工,更要練習步操。
《把》劇演員在海關學院開工,更要練習步操。
陳家樂起初對劉佩玥沒好感,後來才漸漸走近。
陳家樂起初對劉佩玥沒好感,後來才漸漸走近。
黃智雯與袁偉豪是人人稱羨的一對。
黃智雯與袁偉豪是人人稱羨的一對。