挑戰宋慧喬戲路 鄺潔楹博做女一 激勵「哈比人」

無綫熱播劇《七公主》因「劍神」張家朗在東京奧運奪金而提早播出，劇中玩劍擊的鄺潔楹事前特訓4個月，她表示最難是拍攝最後一場重要賽事，要做出很多高難度動作，訓練了3星期仍未做到，但她不服輸：「我同教練講，畀多幾日時間我，如果臨拍前3日都未練到水準就搵替身。」最終她拍了8小時，親身完成所有動作，全場為她鼓掌，令她十分感動。

似背對白機器

有份參演《愛．回家之開心速遞》的她，今次首度演正劇，自爆被監製彈「好演」：「即係話我造作！我冇受過正式演戲訓練，以為做晒表情動作就得，變咗一個背對白嘅機器，多謝導演慢慢教我點樣自然啲。」《七》劇令她愛上演戲，並決心上演技班：「嗰時以為有處境劇經驗，唔係白紙一張，但原來同正劇演繹方式唔同，希望將來畀人覺得我唔同咗。」

問到可想做「女一」？她笑說：「如果做到『女一』，應該同當初知道要演劍擊手一樣呆咗。」身高1米55的她自知身形嬌小：「可能有人覺得邊有咁細粒嘅主角，但例如韓國嘅宋慧喬，佢只有1米60，但劇本有細粒嘅情節，例如趷高腳錫、被男主角熊抱、壁咚咁，可能我都有細粒嘅戲路。如果我做到女主角，希望激發到細粒女仔嗰團火同夢想，尤其是依家興最萌身高差。」