【捱出頭】《那些我愛過的人》下周首播 馬貫東上位做男二

無綫劇集《那些我愛過的人》將緊接《降魔的2.0》於下星期一（8日）出街，劇集選角十分有新鮮感，由黃翠如及「亞視CEO」林文龍擔正，仲搵咗馬貫東（Mark）及連詩雅（Shiga）做男二及女二，今次係馬貫東入行十幾年嚟首次擔任男二。

現年33歲嘅馬貫東，07年參加藝員訓練班後入行，同期有張頴康及樂瞳等等。多年嚟，佢都係喺劇集做一啲唔起眼嘅角色，例如侍應、記者及街坊等等，雖然係認得佢個樣，但相信唔係太多人記得佢個名。直至2016年佢終於有機會擔演要角，喺《鐵馬戰車》中飾演警長「揚明」，憑演出生動自然令觀眾留下深刻印象。後來更有機會加入處境劇《愛•回家之八時入席》，佢喺劇中飾演「十仔」唐中書，係古曉臣（黎耀祥飾）嘅愛徒，戇直乖乖仔形象深入民心，更憑角色獲提名《TVB 馬來西亞星光薈萃頒獎典禮2016》「最喜愛 TVB 飛躍進步男藝員」及《萬千星輝頒獎典禮2016》「飛躍進步男藝員」。

如果要講佢最深刻嘅角色，相信唔少觀眾會答係《愛•回家之開心速遞》嘅「暖男」秦博思（博士），博士起初心繫熊若水（呂慧儀飾），不過Mandy（謝芷倫飾）並冇放棄，最終打動男方，後來博士仲話希望同Mandy正式開始拍拖。唔少觀眾好鍾意睇呢對「博香CP」，之後馬貫東更憑角色獲提名《萬千星輝頒獎典禮2017》嘅「最佳男配角」，不過好可惜佢哋已經離開劇組。

之後，馬貫東喺《金宵大廈》單元《洞》飾演偷窺狂李家俊，經常透過牆上嘅洞去偷窺住隔壁嘅Mia（歐陽巧瑩飾），日日都要偷睇，唔睇唔安樂，完全俾到人一種變態嘅感覺。馬貫東嘅可塑性都幾大，做乖仔又得，變態偷窺狂都難佢唔到。

而今次馬貫東喺新劇《那些我愛過的人》飾演一位患自閉症譜系障礙嘅醫生「古希晨」，將會同Shiga飾演嘅方書文有感情線。有興趣睇馬貫東演出嘅朋友，到時記得準時收睇啦！