搵胡鴻鈞許廷鏗找數 吳若希開騷為好友破冰

吳若希入行多年,今次是首次在港開個唱。
吳若希入行多年,今次是首次在港開個唱。

吳若希將舉行首個香港個唱,已誠邀陪伴她成長的好友許廷鏗及胡鴻鈞撐場,不過兩位男閨蜜傳反目多時,這個兩男一女的「嬲」字組合或只是一廂情願,但她仍大打友情牌:「呢個係我哋當年嘅承諾。」望借自己影響力助好友破冰。

入行12年的吳若希(Jinny)將於12月11日假旺角麥花臣場館舉行個唱,日前她自爆開騷是臨時決定:「因為喺廣州開咗3場,吸收咗經驗,原來舞台冇舞者都可以有咁好反應,見場館有期咪加開香港站,其實好多人問點解唔喺我最好嘅時機開香港場,其實係因為我驚青,細心睇番我以前啲唱歌片,揸咪隻手係震緊,加上我係個一做就要做到最好嘅人,依家克服到淆底,自己已經Ready好。」

談及香港處女騷的嘉賓陣容,她目標是請前星煥唱片公司的同門,可是鍾嘉欣、關心妍及陳法拉早是「大人」非陪她一齊成長,所以情傾風雨同路的許廷鏗(Alfred)及胡鴻鈞(Hubert):「以前我出台前會淆底到搣瘀晒佢哋啲手。」但有指兩人傳不和似乎難成事,她就覺得:「佢哋喺我心目中嘅地位好重要,我喺佢哋心目中一樣重要,當年我哋承諾過邊個第一次開騷,對方都要嚟撐。」

問Alfred和Hubert是否反目?她多度避談,只認私下少齊人見面:「大家各自各忙嘛!(邊位應承會嚟?)要睇佢哋工作安排,依家都係等緊回覆,如果唔成事,是但一個嚟,我都好開心,不過3個一齊係我最想嘅,希望可以喺台上重聚啦!」

考慮搵贊助隆胸

Jinny自稱行感性女歌手路線,笑言要為傳媒而性感,若遭歌迷嫌棄其平胸身材或會再考慮隆胸:「睇吓有冇贊助,如果有就做性感歌手。」問老公想她升多少Cup?她竟說老公極力反對:「我哋每次鬧交,就會攞呢樣嘢嚟講。」雖然老公不愛「大胸老婆」,但卻是其「天字第一號鐵粉」。問可會邀老公上台合唱?她堅拒說:「唔會,佢聽晒我啲歌,但佢唱開羅文、甄妮啲歌,而且仲唱得唔好聽。」

吳若希與許廷鏗及胡鴻鈞的承諾能否兌現呢?
吳若希與許廷鏗及胡鴻鈞的承諾能否兌現呢?