政Whats噏:區選冇定案 民政處電郵現「馬鞍山區會」洩天機?

政Whats噏:區選冇定案 民政處電郵現「馬鞍山區會」洩天機?

呢屆區議會嘅任期年底屆滿,但會唔會有換屆選舉同乜嘢安排都未有,當局日前回覆立法會議員嘅書面提問,仲話檢討緊地方行政,暫時冇嘢可以公布,但民政事務處一封電郵竟然洩露天機?

話說民主派嘅沙田區議會副主席冼卓嵐日前喺社交平貼上載咗張相,佢喺貼文話「係咪透露緊畀我知下屆區議會點劃區」?原來佢收到沙田民政處比佢嘅電郵,唔知係咪民政處職員搞錯,嘅郵件上面竟然寫住「馬鞍山區議會,冼卓嵐議員」。

依家18個區議會,只有沙田區議會,並冇馬鞍山區議會,而冼卓嵐所屬嘅選區係耀安,呢個選區確實喺馬鞍山。見到封電郵,同為民主派嘅油尖旺區議會副主席朱子洛都忍唔往留言話「你知得太多了」。

大埔區議會主席毛家俊亦留言話「係咪拎埋我哋呢邊個西貢北先」?冼卓嵐回應話「可能西貢北遲下『回歸』西貢區議會」,另有網友就話「脫離沙田區,如昔日葵青區脫離荃灣區般」。亦有網友話「佢(民政處)係咪想打馬鞍山區議員?定係想打沙田區議會?」仲話搞到佢好亂添!