雅虎香港新聞 新年長假煲劇應節 無綫賀歲劇總有一套啱你睇！
聽日就係大年初一啦！由於疫情持續嘅關係，唔少人可能都會乖乖地留喺屋企過節，咁煲劇同睇戲絕對係留家抗疫嘅娛樂之一。適逢農曆新年連假，大家可以睇賀歲劇應下節，其實過往無綫都有準備賀歲劇陪觀眾開開心心過新年，相信總會有一套啱你睇！
《大醬園》2020年
以醬油作題材《大醬園》，由朱晨麗、何廣沛、龔嘉欣、吳岱融及龔慈恩等人主演。劇集以民初三十年代作為背景，講述佛山大醬園萬冠園嘅發展，當中牽涉萬家嘅恩怨情仇、爭產、女性如何打破傳統封建制度及夏小滿（朱晨麗飾）身世之謎等等。龔嘉欣飾演嘅終極大反派葉細么絕對係最亮眼嘅一位，佢為求目的不擇手段，真係睇到觀眾不寒而慄呀！
《黃金有罪》2020年
《黃金有罪》搵嚟張兆輝、蕭正楠及姚子羚等人主演，劇集以股市最風起雲湧嘅80年作為背景，再加上轟動一時嘅「佳寧案」作為題材。劇情講述泰國華僑榮木桐Gordon（張兆輝飾）由最底層開始做起，點樣為咗錢出賣親友成為香港首富。另外，劇中演員嘅造型及道具都有參照潮流及環境，唔知有冇勾起你哋嘅集體回憶呢？
《荷里活有個大老千》2019年
賭博恩仇劇《荷里活有個大老千》邀請多位老戲骨助陣，包括鄭則仕、秦沛、湯鎮業及金燕玲等等，淨係睇佢哋之間嘅演技大鬥法，已經夠晒睇頭啦！劇集以60年代的香港為背景，講述以老千技術聞名嘅「千門八將」派系嘅恩恩怨怨，龍四（鄭則仕飾）被大師兄龐峰及華探長文雄（湯鎮業飾）設局陷害入獄，而女友百合（張慧儀飾）更被文雄搶走。出獄後，龍四成為有名嘅電影製片，與女兒小雨（王子涵飾）及百合重逢，最後更與文雄決一死戰！
《波士早晨》2018年
由李佳芯（Ali）、黃智賢及陳慧珊等人主演嘅《波士早晨》，以辦公室政治為題材講述一班秘書同埋講述辦公室嘅求生之道。一班女演員喺劇中飾演不同老闆嘅秘書，當中Ali飾演收兵女神秘書Roxie就係最索、最有話題嘅一位，絕對係成套劇嘅焦點。
《乘勝狙擊》2017年
以賭博及懸疑為題材嘅《乘勝狙擊》，搵嚟陳展鵬、林夏薇、陳山聰及傅嘉莉等人主演，講述老千集團個個身懷絕技，主腦一哥（陳展鵬飾）率領Win姐（林夏薇飾）及Hugo（陳山聰飾）等成員，混入賭場向賭王霍駿昇（單立文飾）展開報復大計。雖然賭博題材吸引，但就引起抄襲疑雲，被指與ATV劇集《勝者為王》及西片《非常盜》有唔少相似嘅地方。
《財神駕到》2017年
新年當然就睇賀歲劇，《財神駕到》呢個名真係夠晒好意頭。劇集搵嚟黎耀祥、單立文、何廣沛、傅嘉莉、姚嘉妮及樊奕敏等人主演，講述財神（陳山聰飾）嘅一次失誤，將原本俾好人梅賽乾（黎耀祥飾）嘅馬票頭獎俾咗小人王百萬（單立文飾），所以佢被貶到凡間扭轉錯誤，投胎成為王百萬兒子王招財。劇集主要發放正面訊息，例如要做個好人及好人一定會有好報等等。
《味想天開》2017年
劇集由洪永城及蔡思貝擔正，講述丁一山（洪永城飾）係一個擁有金舌頭嘅鄉下仔，其後得到名廚蓋兆天（黃子恆飾）嘅賞識及幫助研究新菜式，喺石柔及蓋兆天協助下成為一位著名嘅「金蓮花」食家。雖然劇集有唔少搞笑位，但劣評如潮，主要原因係鬧爆洪永城黐脷筋，話冇字幕聽唔到佢講咩，同埋話頂唔順蔡思貝嘅高八度聲線。
《公公出宮》2016年
劇集搵嚟黎耀祥、蕭正楠、陳國邦、曹永廉及胡定欣等人主演，由於劇情輕鬆搞笑，播出時贏得口碑。劇情講述大清亡國後，所有公公都被解散出宮。幾位末代太監李肅恭（黎耀祥飾）、丹田（陳國邦飾）和陳小鳳（曹永廉飾）遇上江湖騙子崔晉昇（蕭正楠飾），其後誤打誤撞入咗金家做下人。佢哋發揮宮中生存之道，將主子服侍得妥妥當當，不過佢哋由紫禁城嘅公公做返普通百姓，好多嘢都要重新學習，結果引發唔少蝦碌場面。
《警犬巴打》2016年
由黃宗澤、鍾嘉欣及黃浩然等人主演嘅《警犬巴打》，講述黎溢湫（黃宗澤飾）有一段不堪回首嘅童年，長大後就加入警隊，不過因為性格火爆被調去做領犬員，與警犬一同接受艱巨嘅訓練課程。而佢亦同獸醫馬志昊（鍾嘉欣飾）由鬥氣冤家變成情侶。
《倩女喜相逢》2015年
古裝喜劇《倩女喜相逢》由薛家燕、蕭正楠、麥長青、梁競徽、滕麗名及湯盈盈等人主演，劇情講述窮書生寧采臣（蕭正楠飾）上京趕考，期間盤川用盡住進蘭若寺，點知遇上女鬼聶小倩（薛家燕飾）。聶小倩為咗報恩決定改變恩公命運，一直喺暗中守護佢，不過佢法力不逮，導致事情弄巧反拙，鬧出一堆笑話。劇情輕鬆搞笑，真係啱晒一家大細一齊收睇呀！
《新抱喜相逢》2014年
由薛家燕、滕麗名、湯盈盈、敖嘉年及麥長青等人主演嘅《新抱喜相逢》，講述郭菲菲（滕麗名飾）及文彩菱（湯盈盈飾）由娛樂圈爭上位鬥到入豪門，二人分別戀上連氏企業大少連祉森（麥長青飾）及二少連祉傑（敖嘉年飾），何少蘭（薛家燕飾）迫於無奈接受佢哋入門。原來唔止佢哋係好戲之人，奶奶都係笑裏藏刀，鬧出連番笑話。
《初五啟市錄》2013年
由黃浩然、郭羨妮、陳錦鴻及林夏薇等人主演嘅《初五啟市錄》，以民國初年作背景講述蘇飛（黃浩然飾）管理「永昌盛公司」，不過一班兄弟都係老弱傷殘，生意入不敷支，最後仲交唔到地稅俾政府封埋舖。後來，蘇飛就帶住一班兄弟去到花地碼頭接手「咕哩館」。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
