新店遭掃場 損失6位數 Gordon停工一日定驚:最緊要人冇事

Gordon表示沒有與人結怨,不明為何店舖被破壞。
Gordon表示沒有與人結怨,不明為何店舖被破壞。

前組合天堂鳥成員Gordon(葉泓聲)與友人合資經營的咖啡店遭人惡意破壞,損失慘重,不過他直言:「最緊要人冇事!」感恩有一班員工在背後支持,揚言不會因此卻步,繼續向夢想進發。

Gordon與友人陳樂榣(Ally)合資、位於大坑的咖啡店已試業2個多月,一直相安無事,卻於上周舉行正式開張儀式後,當晚被人闖入破壞,涉案疑犯已被拘捕,咖啡店亦已重新營業。

感謝員工通宵收拾

本報日前發現Gordon與Ally落舖在店內幫忙,Gordon受訪時無奈表示財物損失金額達6位數:「不過錢財身外物,最緊要員工冇事!睇番CCTV大家都好驚,見到個員工畀人搶咗部電話想搶番,我同佢講下次唔好咁傻,電話冇咗我可以買番,唔好傷到自己。」他感激員工雖然情緒受到事件影響,但事發當晚仍主動回店幫忙清理:「佢哋仲擔心過我,連兼職同事都返嚟幫手執拾到夜晚3點,第二朝再返嚟繼續執,夜晚就已經開番舖,真係好感動。」他指身為老闆始終都擔心,與Ally事後休息了一整天去平復思緒,並表示會加裝更多閉路電視加強保安。

他坦言對事件仍一頭霧水,稱從未與人結怨,並說:「做生意以和為貴、和氣生財,咩事都可以傾。(有冇收過任何騷擾、警告?)完全冇,係食環署囉!哈哈。」他指事件未有打亂其部署:「順其自然,人冇事最安心。」他感謝身邊朋友的關心問候,希望事情能盡快查個水落石出。

Gordon感謝員工的幫忙。
Gordon感謝員工的幫忙。