方力申傳與藝術家Maple蜜運中 女方係《以神之名：信仰的背叛》 邪教受害者？

「飛魚王子」方力申（Alex）喺2016年與鄧麗欣（Stephy）結束10年情，之後雖然與陳瀅、馮盈盈等多位女星傳出緋聞。上年喺ViuTV節目《晚吹-有酒今晚吹》擔任嘉賓期間，更自爆已經單身5年及有玩交友軟件，不過感情都未有著落。去到噚日（2日），有報道指方力申成功脫單，與年輕藝術家Maple Yip蜜運中，不過為咗保護剛萌芽嘅愛苗而保持低調。網民們對方力申新歡Maple嘅背景感到非常好奇，仲有網民指新歡同Netflix紀錄片《以神之名：信仰的背叛》嘅受害者係同一個人。

現年43歲嘅方力申自與Stephy分手後，經常被網民關心佢嘅感情狀況。有指新歡Maple係一名年輕藝術家，精通中、英、韓三國語言，走氣質路線嘅Maple外貌清純出眾，留有一把長頭髮、眼大大兼鼻子高，外貌絕對不輸小方以往嘅緋聞女友，更被網民稱為「氣質版馮盈盈」。報道仲指二人因藝術而結緣，方力申爸爸開設畫廊超過40年，而佢自己亦有收藏畫作藝術品嘅興趣。

方力申與Maple​緋聞消息傳出後，有網民指Netflix韓國紀錄片《以神之名：信仰的背叛》嘅受害者葉萱同Maple好似樣。《以神之名：信仰的背叛》係一套以邪教組織為主嘅紀錄片，第一個單元就講述韓國攝理教。前教徒葉萱「Yip Maple Ying Tung Huen」選擇勇敢企出來，更加喺上年3月以流利韓文開記招指遭攝理教洗腦及性侵，當時佢話自己嚟自香港，喺2011年自己仲係中學生嘅時侯，因為覺得生活空虛，再加上喺銅鑼灣遇到教徒，更被佢哋以問卷方式帶佢加入教會。三年後佢前往韓國，仲極速成為高階信徒「明星」。教主鄭明析提拔佢喺教會生活長達10年，享有同教主貼身活動嘅機會，令到唔少教徒羨慕。另外，佢仲有喺教會中擔任翻譯工作，為教會活動或影片做中文翻譯。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！