星空下的仁醫︳演病童搶鏡小演員一覽 17歲黃可盈拍過三十幾套劇

TVB台慶劇《星空下的仁醫》雖然收視平平，唯一可喜之處係口碑唔錯。除咗2大視帝鄭嘉穎同馬國明、表現突出嘅鍾嘉欣同周家怡之外，一班演住院病童嘅童星都有出色表現。話唔定十幾年後，佢地分分鐘就係下一個視帝視后！

黃可盈

前幾集講述黃可盈飾演嘅少女阿雪患有卵巢腫瘤，同時亦被發現懷孕，佳雪父（韋家雄飾）為保愛女性命同意進行人工流產，但佳雪想保住BB，於是佢同主診醫生周家怡提出要求。黃可盈要演繹出內心掙扎，演技恰到好處，完全唔似17歲「小」演員！梗係啦，黃可盈5歲就拍廣告入行，之後再被TVB監製睇中邀請拍劇，至今拍過嘅TVB劇超過30套，比起劇中演實習醫生嘅新人更有經驗。演戲之餘，黃可盈仲考到八級鋼琴、識玩結他兼係香港兒童合唱團成員，多才多藝。

林靖文

另一個個案病人琳琳由林靖文飾演，劇中琳琳因為媽媽基因缺陷而得到遺傳病，要入院做手術之外，連媽媽都因為操勞而暈倒。林靖文要演爆喊戲份，完全唔使眼藥水幫手，睇到觀眾好心痛。12歲嘅靖文原來係「喊戲專家」，之前拍《法證先鋒IV》都要喊到眼腫，難怪連影后惠英紅都大讚。

陳卓妍

鍾嘉欣飾演嘅章以芯，入職安妮醫院後第一個病人係心臟有事嘅音樂少女喬喬。飾演喬喬嘅陳卓妍同樣有唔少忐忑不安嘅戲份，仲要講大段對白向好友同屋企人表達心跡，唔容易架！原來陳卓妍本身係少女樂隊Busy Bee Girls主音，識玩多種樂器，隊BAND開show仲有阮兆祥做嘉賓添。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！