星空下的仁醫｜大結局還當年龔慈恩手術失誤清白 大團圓結局令網民期待續集

台慶劇《星空下的仁醫》播出以嚟，無論劇情定演員演技都廣獲好評，當中鍾嘉欣演繹痛失BB爆喊一幕，令唔少網民大讚佢可憑此劇奪得視后殊榮。噚晚（22日）播出大結局後，網民激讚《星空下的仁醫》係近年TVB嘅佳作。

《星空下的仁醫》大結局劇情講述，叢昕（馬國明飾）面對內部聆訊真相大白，而甘楓（鄭嘉穎飾）嘅雙胞胎病人需要做難度相當高嘅胰尾切除手術，於是向20年前同樣處理過同類型手術嘅懷霜（龔慈恩飾）求助，不過當年手術正正造成「林美詩事故」，令懷霜未能釋懷；而呢次過程中就發現當年用嘅止血超聲刀儀器有問題先會造成手術失敗，還懷霜一個清白。結局尾聲，甘楓（鄭嘉穎飾）、Eman（鍾嘉欣飾）、叢昕（馬國明飾）、海琪（周家怡飾）、柏熙（羅子溢飾）及卓盈（張寶兒飾）相約觀賞天鵝座星空，喺星空下，叢昕與海琪親吻、柏熙與卓盈拖手互表心意，而甘楓與Eman亦有情人終成眷屬，成就大團圓結局。

網友大讚《星空下的仁醫》係今年最佳劇集，仲話比《On Call 36小時》、《白色強人》更好睇，紛紛留言表示：「這是近年TVB的佳作，演員入戲，劇情明快，牽動觀眾情緒。」、「真心覺得呢部可以攞最佳劇集」、「TVB少有有heart劇集！」等等，仲有唔少網民覺得25集好快就完咗，希望有續集講述多啲兒科中心同團隊搶救嘅場面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！