暴飲暴食兼喪喊 陳曉華擔正唔再怯 質問自己：想後悔？

前港姐冠軍陳曉華終卸下「包袱」，搣甩驚青及保守性格變得「膽生毛」，免得在人生再留下遺憾。她又重提早前突然發脹，自爆當時暴飲暴食又喪喊，負面情緒一發不可收拾。

陳曉華入行3年、接拍第4套劇集《異搜店》已「升呢」擔正做女一，她感恩得到難能可貴的機會，同時回想起約一年前的狀態，直言無論在心態及拍攝上的習慣都改變不少︰「以前係個幾驚青嘅女仔，咩都好擔心、怕失敗，但過咗呢套劇、沉澱咗一年，唔再驚做錯事，反而想試多啲。因為睇番播出，好後悔當時冇做得更好，例如女主角係個好陽光嘅人，應該要再熱情啲，之後喊戲嘅層次又未算做得好，想做到90分，但依家得50分。」

也許開始經營個人頻道是其轉捩點，近半年的拍片生涯令她學懂跟自己溝通︰「只有試新嘢先會有啲可能性出現，所以每當有質疑嘅時候，都會反問自己『你唔係想後悔呀？』希望大家可以見到我有進步。」又指今次很執着，誓要做得比處女劇《迷網》好，並憶述當年劣評如潮，雖然之後演《七公主》有明顯進步，但仍覺得未夠︰「只係大家對我嘅包容好大。」

自薦效法視后演肥妹

提到早前暴脹，她解釋是情緒及壓力所致，結果上鏡時肥時瘦，又有水腫︰「無論做咩都覺得自己做得唔好，唔係外界畀我嘅壓力，而係自我要求高，唔識得去解決、面對，咩都食嘢先、喊咗先。」問到會否擔心患上抑鬱？她表示︰「以前做護士有去精神病房實習，所謂嘅情緒病其實唔可以話係一種病，而係每個人都有難關，只係容易定困難咁過渡。我好好彩，今年搵到個方法處理情緒，又冇覺得特別驚，不過突然脹咗10kg都真係可大可小，嚇到我要即刻減！」並自言體重飄忽或許會有另類優勢︰「幾啱拍由肥變瘦嘅角色，好似胡杏兒《肥田囍事》咁，減肥係好辛苦，但我願意㗎！」