【曾志偉上場】執導《安樂戰場》強暴戲被傳假戲真做 女演員疑似受辱重創

新上任TVB副總經理、負責掌管綜藝、音樂製作及節目的曾志偉，一上場就快手開工，話咁快就將TVB同三大唱片公司多年未能拆解嘅版權風波搞掂。志偉向來工作投入，近年收到新人劇本會親自約見了解，做《獎門人》成日同幕後度橋，甚至未度好唔俾走！面面俱圓嘅志偉都試過喺工作上出事，31年前執導嘅電影《安樂戰場》，因為一場強暴戲嘅安排，令佢耿耿於懷。

《安樂戰場》以「曾志偉第一套主題嚴肅的作品」做賣點，故事講述一個香港旅行團到菲律賓觀光，點知遇上當地政變而成為恐怖份子嘅人質，被拘禁期間遭遇悽慘，最終團友反抗逃出生天。演員有溫碧霞、唐麗球、黃光亮、余倩雯及鄧碧雲等。

當年電影到菲律賓實地拍攝，亦搵到當地特約演員參與。戲中有2場強暴戲，多年來一直有傳演員兼導演嘅曾志偉要求「打真軍」，後來志偉接受訪問交代箇中情況。佢話其中一場強暴戲，本來只係想簡單交代，安排受害嘅女演員衣衫襤褸咁出現就算，但係女演員話全套戲呢一幕有得做主角，建議拍得逼真啲。於是志偉同特約演員及女演員夾好，底線係雙方重要部位冇接觸就得，而且拍完會同女演員睇返呢場戲，如果尺度太大就銷毀呢場戲。佢又叫女演員有事就要大叫救命。

到拍攝嗰陣志偉安排清場，現場只有演員同攝影師。點知roll機冇耐，女演員就大叫，志偉以為只係演緊戲冇理會，後來其他人發覺唔妥，甚至有人爆粗先知「出事」。當時佢見到女美術指導攬住喊緊嘅女演員，志偉就俾人鬧「唔係人」。到底係咪有人「假戲真做」？志偉喺訪問度冇表明。

事後團隊氣氛相當差，志偉甚至話拍完套戲同全部人反晒面咁返香港，而呢場強暴戲拍出嚟嘅畫面效果太差，最終冇用到。

而喺《安樂戰場》戲中被強暴嘅余倩雯，多年前接受另一份雜誌訪問，憶述當年拍《安樂戰場》嘅強姦戲時，被6呎高菲律賓演員撞向枱角受傷，返香港要做鼻骨移植手術，事後覺得為幾萬蚊片酬而賣命唔值得。事後余倩雯轉去TVB拍電視劇，但係被人嫌佢「老牛聲」；於是轉做幕後，做過陳慧嫻保姆同形像指導，再同後來嘅老公開唱片公司。

除咗呢個話題，《安樂戰場》另一個為人談論嘅焦點，係劇情被指同2010年香港旅行團喺馬尼拉被脅持、最終流血收場嘅慘劇十分相似，令唔少港人感慨。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！