曾志偉指ViuTV收視低 193反擊人氣急升IG暴增10K粉絲

曾志偉回歸無綫後推出多個綜藝節目與ViuTV硬撼，好似啱啱嗰個星期日兩台分別播出重點節目《開心大綜藝》及《最後一屆口罩小姐選舉》。曾志偉受訪時指ViuTV收視得4點，題材偏門，認為應該與J2台比較而唔係翡翠台。之後ERROR成員之一嘅193（郭嘉駿）反擊：「收視點得嗰幾百部電視機，我哋不嬲都唔介意」，又笑言J2節目「40幾歲仲做後生仔傾吓偈嗰個啊嘛」。有唔少網民認為佢嘅言論係「講真話」，令佢人氣上升，IG一晚激增10K粉絲至10萬4千名followers（截至4月13日下午一時）。

可能有好多睇開無綫嘅觀眾都未識邊個係193，193呢個名係來自佢身高193CM。原名郭嘉駿Denis嘅193今年31歲，2018年參加ViuTV節目《全民造星》入行，雖然佢30強止步，但搞笑形象成為吸引觀眾，更有網民大讚佢搞笑, 有娛樂性及有魅力。連ViuTV金牌監製花姐都話佢係可造之才，其後與肥仔、阿DEE同保錡組成ERROR出道，並推出多首歌曲，例如《404》、《我們很帥》及《I Promise》等等。除咗做歌手之外，193仲參與咗唔少綜藝節目及劇集，當中包括《花姐ERROR遊》、《是滴是友》、《考有Feel》、《最後一屆口罩小姐選舉》及《男排女將》等等。雖然佢係走搞笑騎呢路線，但佢頗受網民歡迎，更曾經有粉絲為佢製作廣告燈箱，真係一啲都唔簡單。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！