曾志偉王祖藍埋位 TVB上半年蝕少9百萬 業績報告稱《聲夢傳奇》「全城矚目」會有第2季

睇娛樂新聞，唔止睇明星動向嘅，睇財經版都有發現！今年電視台大戰熱熱鬧鬧，早前ViuTV母公司電盈公布上半年業績，提到ViuTV業務虧損收窄，主要原因包括旗下男團MIRROR受歡迎帶來收入，加上節目收視上升，廣告收益升咗超過6成至1.88億元。

財金界估計以收入走勢推算，Viu有望短期內轉虧為盈。那邊廂，大台TVB成績如何？

尋日電視廣播公布2021年上半年業績，收入微升2％至近12.5億，廣告收入增加31％，但係上半年仍然出現虧損2億8400萬元。對比上年同期蝕2億9300萬元，係有所改善嘅。今年年頭TVB搵咗曾志偉同王祖藍分別出任副總經理同首席創意官，業績公布都有提呢件事，並且提到請佢地係為咗加強綜藝節目製作實力，而且「兩人於香港及中國內地的內容創作及直播帶貨方面均具有豐富經驗，且於娛樂界擁有廣闊的人脈資源」。

的確二人上台後，TVB推出一連串新類型綜藝節目，業績公布提到上半年「成功打造多個受歡迎綜藝節目」，仲話「《好聲好戲》及《識貨》亦在平日較晚的黃金時段錄得不俗的收視」。睇返資料，《好聲好戲》第一周跨平台收視19.4點，第2、3周因為改變計算法未有公布，第4周直播收視有15.3點，唔算標青但已經係上半年稍為突出嘅綜藝節目。至於一共10集嘅《識貨》，直播收視分別係10.6及12.3點，反應平平。

上半年業績亦有唔少篇幅提及《聲夢傳奇》，形容「在比賽期間全城矚目，吸引了一批年輕觀眾群收看」、「節目結束後仍有大批觀眾追蹤其社交媒體動態」，亦提到姚焯菲(Chantel)唱《戀愛預告》嘅片段喺Youtube有近400萬次收看，而《聲》決賽更有26.5點收視。業績文件提到已經著手籌備第二季。

業績升跌梗係唔止一個因素，不過以上半年最大動作嚟睇，TVB搵曾志偉同王祖藍埋位，推出大批綜藝節目之後，公司半年只係蝕少9百萬。2位真係要加把勁先得。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！