曾志偉vs193 ︳逐點fact check ViuTV收視少過4點？收視唔止計幾百部電視

呢期娛圈熱話，都可以話係TVB高層曾志偉同組合ERROR成員193（郭嘉駿） 嘅隔空罵戰。「獎門人」話上任後就問ViuTV高層魯庭暉邀請姜濤「要人」但被拒，不過轉頭又踩Viu收視得4點，收視以至節目風格只能同J2相比。193回應時就連環寸爆大台「佢哋係畀老嘢睇架嘛」、「收視得幾百部電視機，我哋唔理好耐」，仲話「J2做咩架？係咪40幾歲仲話後生仔傾偈嗰個？」。193因此「一戰功成」，IG Follower人數旋即多2萬人！

我地唔討論邊個有道理，但係曾志偉同193講嘅論點，邊個啱邊個錯？

收視計幾百部電視

以往香港收視調查方法，的確係以全港800個抽樣家庭安裝嘅收視紀錄儀所得數據，再計出電視節目收視率。2018年開始，香港三間電視台(TVB、ViuTV及奇妙電視）聯同廣告商會成員公司成立「香港電視觀眾收視調查創辦委員會」（FSC），並委任媒體研究公司CSM，喺2018－2023年期間以新方式進行收視調查，保留原有用「黑盒」收集嘅數據之外（抽樣家庭增至1000個），仲會計埋節目喺網上觀看嘅數字。後者會計算一個節目播出後7日，用手機、平板電腦等裝置，喺官方平台嘅點擊量，配合現時觀眾睇電視習慣。

而TVB發布嘅收視資料，稱為「7天跨平台總收視」嘅數據來源，仲包括「家外媒體」，即係商場、餐廳大電視都計埋。

Viu TV收視得4點，只係同J2比？

自從5年前ViuTV加入戰團，節目開始多人討論。舊年11月，Viu嘅《全民造星III》氣勢如虹，加上喺12月全港電視轉為數碼廣播，TVB就曾經喺廣告時段列出1－10月所有電視台嘅「直播電視收視點」，等觀眾同客戶知道實際黃金時段收視係點。當中翡翠台平均收視20.6點一支獨秀，拋離另外2間電視台。由TVB呢次公布可見，Viu嘅收視只有2.1點，比曾志偉所講嘅更低！而J2嘅收視就的確同Viu差唔多，有1.9點。不過呢個數字只係計用電視機收睇節目嘅狀況，網路收視並冇反映出嚟。

四十幾歲扮後生仔傾偈？

可以話「靈感源自」台灣節目《大學生了沒》嘅J2清談節目《後生仔傾吓偈》2017年中播放，當時做足9年嘅《大》都完咗一排。節目由固定班底主持人同一班大學生傾吓年青人話題，主持當中年紀最大嘅係陸浩明（41歲），跟住就係黃美棋（31歲），其餘人等都係2字頭，呢期最搶眼嘅新一代「後生仔」游嘉欣仲只係21歲，仲細過姜濤！之不過節目嘉賓就咩年齡層都有，唔少真係長輩級，包括黃夏蕙、曾志偉、汪明荃、鄧梓峰等等，成個節目平均年齡可能就咁拉高晒。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！