雅虎香港新聞 望冧莊最佳衣着 唔恨贏視后 陳瀅見過鬼怕黑 穿4條打底褲防再走光
【星島日報報道】陳瀅繼上次宣傳劇集《美麗戰場》因穿高衩裙走光，昨日再次性感上陣，今次晚裝不僅高衩而且低胸，出席尖沙嘴某商場的聖誕開幕亮燈儀式，今次她加強戒備，上落樓梯時用手遮掩晚裝的高衩位置，直言不想再走光。對於龔嘉欣因新劇《新四十二章》抽起或無緣爭視后，陳瀅不知情，不認為會少了對手，反而有信心冧莊最佳衣 。 文：張穎芝 圖：譚志光
陳瀅昨日直言做足防走光措施，笑稱穿了4條打底褲，並黐了很多膠紙。不想再走光？她說：「梗係啦！點都唔係咁好。（出來之前已check好？）每次都有，但上次失手可能因為掛住拖阿Moon（劉佩玥）隻手，所以我以後唔會拖佢。（同佢絕交？）唔會，但會鬧佢『最衰都係你』。」
返加國度聖誕
聖誕節將至，她或會與好友先去日本遊玩，之後再返溫哥華與家人共度聖誕，問會否在溫哥華結識男仔？她笑說：「都是去見中學和大學同學，家姐會帶我去拉斯維加斯玩，睇下嗰度有冇靚仔，溝下鬼仔。不過其實都唔會，我較傳統，會揀中國籍男仔拍拖。」
陳瀅透露會明年1月返港準備出席台慶頒獎禮和拍劇。問有否留意被指暗寸她的龔嘉欣主演劇集《新四十二章》被抽起，令嘉欣或無緣與她爭視后？她說：「唔知，消息不停變，確實了嗎？劇集很多時會前後調動，《痞子殿下》本來都唔係呢個時候播，《美麗戰場》亦提早了播出。（少了競爭對手？）不會，每年到頒獎禮，都有很多演員一齊提名，所以不會少。（你可有信心？）有信心在最佳衣着。（你之前已獲此獎喎！） 多次先威，要冧莊。」她仍未準備戰衣，笑言台慶太多女仔爭妍鬥麗，今日只得自己先着靚靚示人，又笑稱怕旅行後會肥，看到時身形再選擇戰衣。
■陳瀅以低胸高衩裙大晒本錢。
■上落樓梯時，陳瀅都用手按實開衩位，以防歷史重演。
■陳瀅上月拖劉佩玥上樓梯時，疑似走光。 （資料圖片）
■陳瀅以拖尾長裙晚裝現身。
■陳瀅出席商場活動賺外快。
■除了大晒美腿，陳瀅的晚裝更是低胸兼露背。
娛樂
