《木棘証人》前晚首播 網民齊讚韋家雄搶鏡過男一

 《木棘証人》劇照
《木棘証人》劇照

警匪懸疑喜劇《木棘証人》喺星期一(19日)首播,雖然冇大卡士演員助陣,不過就搵嚟相隔4年再拍無綫劇嘅羅仲謙張曦雯韋家雄及張文慈等人主演,劇情講述患有強迫症和言語障礙嘅証人李浩帆(韋家雄飾),目擊到槍殺案事發經過,不過就因為自身問題而無辦法表達出嚟。便衣沙展高力基(羅仲謙飾)就被派去貼身保護佢,佢哋由開始嘅抗拒對方,去到後來慢慢接受,鬧出唔少笑料。至於感情方面,羅仲謙會與張曦雯及張秀文有感情戲,而韋家雄亦同張文慈成為鬥氣冤家。想知網民們睇完兩集有咩感受嘅話,快啲轆落去睇下啦!

好耐冇見羅仲謙
羅仲謙喺2016年拍完劇集《潮流教主》後就離開無綫,積極北上賺人仔。今次《木棘証人》係羅仲謙相隔四年嘅回巢之作,佢喺劇中飾演Hea爆沙展高力基,遇上槍殺案後,佢需要保護目擊証人李浩帆,之後佢哋仲會成為查案拍檔。喺播出嘅兩集就講佢為咗女朋友Yuki(張秀文飾)嘅債務而煩惱,之後仲諗住賭馬搏一搏,點知真係一擊即中,贏咗8萬幾蚊,不過彩票連銀包就俾人偷咗。李浩帆無意間喺後巷執到阿基個銀包,之後仲好搞笑咁質疑佢係唔係銀包嘅物主。睇完羅仲謙嘅演出後,網民們似乎唔係好睇佢嘅演技,反而對佢個樣有興趣啲,網民讚佢依然都係咁靚仔,不過都有網民話佢個樣老咗又膠咗,留言話:「以前羅仲謙好靚仔,點解而家個樣咁膠」及、「轉眼幾年,羅仲謙成個中坑咁.」等等。

 《木棘証人》劇照
《木棘証人》劇照

韋家雄首度做男二有驚喜
綠葉王韋家雄入行超過30年,多年嚟都係飾演配角,今次終憑《木棘証人》升呢做男二,韋家雄喺劇中飾演李浩帆 ,係一個好執著、患有強迫症、有潔癖,又好怕同人接觸嘅成衣公司高層。佢喺頭兩集已經成功演活角色兼非常搶鏡,好似喺產品發佈會上與銀包物主羅仲謙視像通話、堅持想要返喺廚餘入面支叉、因失憶以為去咗嫖妓話自己係壞咗嘅人等等。佢嘅表現獲得網民一致讚好,紛紛留言話:「韋家雄真係好正 成套佢carry」、「成套都係韋家雄solo」、「佢好搞笑」、「成套劇暫時韋家雄最好」、「韋家雄演得好」、「最搶係韋家雄,仲演得好搞笑」、「韋家雄直頭似男一」及「韋家雄都做男二 新鮮」等等。

 《木棘証人》劇照
《木棘証人》劇照

張曦雯都係咁靚女
「宅男女神」張曦雯近年被無綫力捧,擔正做女主角嘅佢喺劇中飾演堅毅獨立嘅大律師李頌盈,喺第一集就已經同羅仲謙喺警署爭執,拒絕阿哥李浩帆做證人,上演鬥氣冤家戲碼。網民紛紛留言大讚靚女同演技自然:「Kelly好正」、「張曦雯真係好正」、「今套好正 」、「有Kelly會吸引我睇」、「張曦雯真係女神級仲好索」、「張曦雯做戲出奇地自然」及「今次佢做得好好,好自然,微表情都好咗」等等。

 《木棘証人》劇照
《木棘証人》劇照

張秀文扮𡃁妹趕客
過往主力向綜藝節目方面發展嘅張秀文,今次喺《木棘証人》戲份甚重,飾演高力基女友Yuki,係一個虛榮又揮霍嘅女仔,因債務問題要搵男朋友幫手。現年33歲嘅張秀文超齡扮𡃁妹,唔少網民都話趕客,不過佢喺劇中經常以超短牛仔褲示人,亦有唔少網民大讚佢身材好好,尤其係一雙長腿。至於演技方面,網民都一面倒大彈佢,留言話:「張秀文把聲搞到我拳頭硬晒」、「見到張秀文的浮誇,有點擔心套劇。」、「張秀文所謂嘅「演技」真係不敢恭維,佢一出場就好趕客」及「睇見張秀文扮嗲時,真係想作嘔,好難頂!」等等。

 《木棘証人》劇照
《木棘証人》劇照

主題曲又係鄭俊弘唱
鄭俊弘喺今年已經先後為唔少劇集唱主題曲及插曲,例如《快閃》(《黃金有罪》主題曲)、《告白 》(《十八年後的終極告白》主題曲)及《不要流淚》(《法證先鋒IV》插曲)等等。而今次《木棘証人》主題曲《謎團》亦都係由鄭俊弘主唱,唔少網民都話好嫌太多同好悶,留言話:「佢太多劇歌了,宜家仲多過hana」及「成日都係佢唱,好悶」等等。