林子博移英一個月拍片呻未租到屋及仔女未搵到學校 網民:冇plan好就帶小朋友移民?

林子博 影片截圖
林子博 影片截圖

現年50歲嘅前無綫娛樂新聞台主播林子博,喺19年慘食「無情雞」被無綫不再續約,其太太董燕君(Shirley)於上年不敵癌症逝世。早前佢遵從亡妻遺願,好好照顧一對子女,選擇舉家移民英國過新生活,唔少網民都留言送上祝福。唔經唔覺佢哋一家三口已經移民英國一個月,早兩日佢喺YouTube開設個人頻道及上載影片,與網民分享近況,自爆仍未租到屋,及仍未安排其子女返學,大嘆「唉!原來唔係我諗咁簡單㗎!」。影片出街後,雖然有唔少網民留言叫佢加油,不過亦有唔少網民鬧爆佢移民決定草率及缺乏準備。

喺影片開頭,林子博就話自己嚟到英國一個月,收到好多朋友嘅關心,不過佢就話小朋友仲未返學,而佢哋亦未租到屋,仍然住喺酒店。之後,佢就解釋自己喺英國嘅近況,並數出幾個難題:首先到達英國後,佢哋先搵酒店暫住,然後一邊搵租盤,不過仍未搵到租盤,原因係當地嘅業主唔會隨便租屋俾人,要看租客有冇工作證明,並唔係坊間所講只要願意交一年租金就會租到屋。第二,林子博就話好多嘢係有關聯性,仔女要返學就要有住址證明,不過酒店並唔係一個住址證明,就算選擇租Airbnb,亦有人指出民宿地址未必可以作為住址證明,因為要有一份正式嘅租約,先可以透過市政局幫忙搵學校入讀。第三,佢就話過多幾日就會搬往民宿暫住,因為住酒店比較麻煩,冇爐頭煮嘢食及冇得洗衣服,導致佢哋經常外出用餐,同埋要儲一大堆衣服拎去洗衣店洗。第四,佢就話最唔習慣係飲食方面,因為香港食物種類繁多,而佢喺英國就不停食漢堡包、沙律及Pizza等西式食物,間唔中先可以食到中餐,所以佢好掛住香港茶餐廳嘅食物。最後佢認為英國人生活節奏比較慢,好似只係租車就已經用咗三至四個星期,即使佢上網睇中咗架車,但都唔能夠即時買到。

林子博坦言原本打算帶仔女移民加拿大生活,原因係多朋友住加拿大及有相熟朋友已經幫佢「搭路」做返老本行,不過可惜佢分數不足,未能達到技術移民嘅要求。

唔少網民睇完呢條片後都留言支持及叫佢加油,例如「子博加油呀!我同女女都係嚟左一個月,都係住緊bnb,啱啱先租到屋!適應新生活確係不容易,尤其得你一個湊兩個。努力,支持你」、「要清楚自己點解要移民,適應力要夠強,好好計劃,有勇有謀過新生活,不要經常回望過去,祝你成功!」及「而家嘅困難一定會過去,祝你同囡囡仔仔會越嚟越順利,子博加油呀」等等。

不過亦有不少網民認為佢為移民準備不俗,紛紛留言鬧爆佢,例如「冇plan好就帶小朋友移民?點做人父母呀??自己攞嚟!」、「唔係灰你,只不過你能力唔高,冇planning又唔夠積極怪咩人?怪你自己走之前冇research好過啦」、「而家移民喎,點解好似當玩咁?乜唔係計劃好先實行架咩?明明自己係香港都撈唔掂,仲要晒錢搞移民,定以為自己去到會好掂?去到搞唔掂就係到拍片講自己有幾慘,想博咩?」、「冇學歷,冇技能,冇錢,衝去英國,2個小朋友讀書要好多錢,你冇planning帶埋仔女同你一齊捱,咁大個人都冇腦!討論區好多人罵梗你累左d仔女,冇書讀係度做乜?」、「​​根本成件事就係弱智, 真心唔抵可憐, 有心想小朋友好,想移民好啲嘅地方, 咁大個人唔識上網做research先?十幾廿歲嘅後生移民讀書都識事前做research啦!真心想小朋友好, 有心移民, 知道自己英文唔好,唔可以岀發前增值下自己先,學下英文好困難?真係急於嗰一時三刻話走就走?大把人都有移民嘅第一次經驗㗎啦,又唔見人哋會搞到好似你依家咁折墮?真心睇唔岀你有幾特別可憐」及「好心你冇能力又冇計劃就唔好人飛你又飛啦, 當玩咁, 你餓死都算, 冇需要post段youtube搏同情架, 好多後生過你既都係自己搞掂, 都唔知你知唔知醜」等等。

有網民亦問林子博「唔搵咗屋搵咗工先至過去」,而佢亦有回覆:「香港出發前已經搵咗工。」及「住屋真係過到嚟先夠膽搵,因為隔山租唔知道附近治安係點!」。

林子博
林子博
林子博
林子博
林子博
林子博

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!