林子博表示染上新冠肺炎 沾寒沾凍發燒至39度

前無綫娛樂新聞台主播林子博，上年遵從亡妻遺願，好好照顧一對子女，選擇舉家移民英國曼城過新生活。佢哋一到埗便開設YouTube頻道，上載影片與觀眾分享生活點滴。去到今日（10日），佢喺社交網站及影片頻道表示自己不幸染上新冠肺炎。

林子博於社交網站上載快速測試結果，並留言話：「妖～中咗！ 冇咳、冇鼻水、冇喉嚨痛、有味覺、唞氣正常。 連續三日燒到39、發冷同周身骨痛！ #快速檢測 #陽性」。另外，佢亦有上載以「我不幸地染病了～Covld-19？Omicron？」為題嘅影片，表示自己不幸染上新冠肺炎。

喺影片開頭，佢表示自己喺1月7日晚上發現不適，感到沾寒沾凍、發燒，及主要感覺到自己好似「作感冒」，當晚佢已經立即入房瞓覺，不過瞓到半夜覺得好辛苦，於是佢就服用咗一啲藥物。之後佢探熱已經去到38度幾，並進行快速檢測，當時仲未驗到啲咩，所以佢就以為自己係普通傷風感冒。但兩日後，佢仍然持續發燒，朋友告知佢又機會「中咗」，於是佢再次進行快速檢測，結果真係不幸染上新冠肺炎，而測試棒嘅「T字線」特別深色，亦即係表示喺佢身體最多菌嘅時候。

對於染上新冠肺炎，佢就話好唔開心，亦話有第一時間叫對仔女戴口罩，自己亦有戴上口罩。而佢呢幾日嘅情況就係發燒至39度、持續發冷及發燒。佢現時已經進行自我隔離，通報國民保健署（NHS），雖然佢可以喺屋企自我隔離，照顧一對仔女，不過佢都好擔心佢哋都染病，「唔知嚟緊佢哋會唔會發病㗎，冇人知，希望唔會啦！唯有真係隔離，我而家自己一間房，因為我呢度有兩間房。」

除咗之外，林子博亦回想過去見過咩人同去過邊度，之後佢亦聯絡佢哋睇下有冇「中招」。佢亦話自己除咗喺除夕晚去伯明翰之外，佢就去四圍去，而佢一家三口到伯明翰嘅一對夫婦，佢地哋都冇染病，所以佢排除咗呢個可能性。究竟佢喺邊度染病？除夕晚後佢冇出席派對及聚會，只係接送仔女返學放學、到超級市場購物及到油站入油，佢長期戴都有口罩，除咗揸緊車時冇戴口罩，即使拉低車窗佢都有戴口罩。所以佢話：「咁究竟喺邊惹返嚟，我真係唔知呀！最有可能係超市，因為超市好多時啲packing，你唔知面頭有冇菌喺度㗎嘛，一係超市啲packing好污糟，面頭有病毒喺度，一係就係對仔女嘅學校惹返嚟，因為群體聚集係得學校。」

林子博指囝囝班上有28個人，只有囝囝一個戴口罩，於是便提出接種疫苗建議，之後佢哋一家三口便去接種疫苗。現時一對仔女並無病徵，亦無不適，所以嚟緊呢幾日會觀察住。最後佢表示「希望唔係重症啦，我最怕係重症！」

影片及貼文出街後，唔少網民都非常關心佢，紛紛留言：「請你多點休息，多喝水，儘快康復，渡過難關，你一定得嘅！！加油」、「希望你早日康復，順利渡過疫境，一家平安」、「​​保重呀！還要照顧對仔女呀！希望你早日康復！」、「飲多啲水，注意休息。祝你們一家三口平安!」及「休息，飲水，自己係房同仔女隔離開，唔好一齊病晒，叫佢哋加倍小心！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！