林鈺洧懶理父母罵戰：打吓交幾開心吖！

應屆港姐林鈺洧、許子萱與邢慧敏，昨日偕陳自瑤出席慈善曲奇義賣活動。對於父親林俊賢與母親Jasmine展開罵戰，連「表姑姐」馮鎵瀠（Naomi）亦加入戰團，斥Jasmine自編自導講大話，林洧鈺說：「上一代嘅嘢我唔清楚，我淨係知道要專注自己嘅生活，同埋事業上嘅發展，佢哋嘅嘢唔關我事。（父母喎！）我覺得佢哋似小朋友，已經冇大家嘅聯絡方式，以前靠我喺中間傳話，依家係你哋（指記者）。（媽咪話爸爸以前唔肯照顧你？）我冇聽過。（成長環境令你對婚姻有恐懼？）揀伴侶一定會揀擇啲，同埋覺得女仔要有自己嘅事業。（敢結婚？）遇到啱嘅人會囉！」

問會否覺得男星多引誘，不會與圈中人拍拖？她說：「我唔係揀行業，我係嫁畀嗰個人，所以持開放態度。（信林俊賢打你媽媽？）佢個樣唔似。（會唔會破壞爸爸喺你心目中嘅形象？）都冇形象。（直接問佢有冇咁做過？）唔想知，有時情侶打吓交（指耍花槍）都幾開心吖！（表姑姐講嘅嘢呢？）好少見佢，大家好疏離。」

陳自瑤任囡囡自由發展

活動上，陳自瑤落力募捐，她說：「讀書時諗過做社工，如果轉行嘅話，都有諗過去慈善團體工作。」她希望幫助更多有需要人士：「今日好多大人畀錢小朋友捐，細個灌輸佢哋去行善好好，我都有咁做。我囡囡好疏爽，有時同佢商量捐贈，佢好肯捐錢。（叫佢做社工還你心願？）想佢自由成長，做鍾意嘅嘢，如果佢想入行，我都冇所謂。」