梁文禮暫停開咪三個月 商台稱雙方同意 網民唔收貨︰點解唔罰艾粒

早前商台DJ梁文禮被爆用私人facebook帳戶毒舌批評樂壇事之後，今日商台喺社交平台宣布「有鑑於本台節目主持人梁文禮近日於社交平台對個別音樂人發出帶有傷害性之評論，經本台負責人與梁文禮共同檢討後，雙方同意於2月27日起暫停其主持人職務三個月，待冷靜反思過後再重新出發」。現時阿禮主持商台嘅節目有《叱咤樂壇》及《903豁達推介》。

上星期梁文禮睇完梁詠琪紅館演唱會後，喺社交平台公開帳戶出咗個限時動態大讚Gigi好靚，但就俾網民踢爆佢喺私人facebook狠批Gigi演唱會由編排、編曲、舞蹈以至服裝都一無是處，仲大鬧Gigi唱得差。本來放緊假嘅梁文禮都要立即返商台開咪，公開向Gigi道歉，強調係出於肉緊先至咁寫。

不過話口未完，有網媒聲稱喺梁文禮私人社交帳戶截圖，見到佢過往嘅帖文，鬧過唔少歌手同樂壇事，例如批評近期環球唱片搵一批新晉歌手如Anson Lo（盧瀚霆）、曾比特、炎明熹等翻唱張國榮作品嘅企劃，係「集體強姦張國榮作品」。之前佢又私下出post狠批Mirror嘅周邊商品同公仔「點解可以咁醜」，甚至爆粗話「千x祈唔好聽Eason嗰個翻唱版本」嘅莫文蔚作品《慢慢喜歡你》。

喺商台宣布阿禮暫停開咪嘅post度，唔少留言認為早前同屬商台DJ阿占同Donald組成嘅艾粒，喺演出上未經同意就拎同事余迪偉嘅溫泉出浴照開玩笑，激到迪偉出post鬧艾粒二人「性取向歧視同埋職場欺凌」，呢件事商台居然無任何行動，批評商台大細超。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！