楊埕搵老公 盲婚啞嫁都制

楊埕(左起)、何天嵐及謝高晉邊個會率先脫單呢?
楊埕(左起)、何天嵐及謝高晉邊個會率先脫單呢?

歌手謝高晉相約師妹楊埕、何天嵐團拜,楊埕笑言屋企新年有習俗,成班人一齊賭錢:「由老到嫩都有唔同嘅局,麻雀、啤牌、魚蝦蟹,氣氛好好。」高晉因為準備新歌和電影,所以新年都要開工,天嵐則笑言近年的電子利是好方便。

三人都自爆單身,幾年冇拖拍的楊埕笑言不抗拒桃花運:「搵男友就免,我要搵老公。」她坦言幾鍾意爺爺嫲嫲的盲婚啞嫁:「我OK㗎,忍讓就一世,佢哋依家90幾歲都好恩愛。」家人曾安排她相睇,但她好怕醜:「朋友嗰啲會好啲。」而身高1米95的高晉笑說:「如果畀我揀,我夢寐以求都係搵個米八,最好有外國血統長頭髮,成個模特兒咁。」天嵐指相士指她適合晚婚,所以她不心急,問到有否考慮雪卵?她笑說:「我諗過借肚生B添,好興吖嘛,唔使自己佗,而且我養咗6隻貓仔,驚有BB時影響到佢哋。」