楊天宇Kaho諗定上門「搶錢」 魏浚笙亂改花名 斗膽笑張敬軒肥

魏浚笙、洪嘉豪及楊天宇因合作賀歲片而結緣，雖來自不同公司，但一碰頭即「狂數」男主角張敬軒（軒公），當中以魏浚笙最斗膽，竟恰前輩硬塞「肥成哥」花名，楊天宇則覺得軒公似動畫人物「多啦A夢」。

張敬軒與王菀之領銜主演的電影《超神經械劫案下》將於賀歲檔上映，有份拍攝的魏浚笙（Jeffrey）、洪嘉豪（Kaho）與楊天宇（Angus）日前齊齊受訪，Jeffrey形容3人一拍即合：「Kaho係降低個Level同我哋溝通。」Kaho則笑指大家「冇營養」。

談及前輩軒公，他們異口同聲說：「零代溝！佢成日Join埋我哋一齊講，都係大唔透。」更「開心大發現」指全數演員有一個共通之處，Kaho說：「都係夠Kai（傻氣）嘅人！」Jeffrey更自爆為軒公改花名：「佢個角色叫『有成哥』，佢啲Fans幫佢整咗個好肥嘅角色公仔，所以我改叫佢做『肥成哥』。（佢有冇睬你？）有呀！仲話畀新人恰，我真係有驚。」

大讚周身法寶

Angus則指軒公似「多啦A夢」，因他周身法寶，最記得有次受傷要敷冰止痛，軒公主動上前慰問：「佢見我痛到手震又冇力，竟然喺半小時內搵咗支活絡油同止痛藥畀我，我哋喺山旮旯嘅地方拍攝，又搵到清音丸畀把聲沙晒嘅演員。」

問如何報答軒公？Jeffrey直接說：「支持同愛佢！」Kaho則提議搞BBQ聚會，由「靚仔廚神」Angus炮製美食。3人都很期待再與軒公合作，剛踩入樂壇的Jeffrey更直言恨獲軒公送歌，Kaho即「讚」他說：「最鍾意佢啲『真假混合音』，連我都拿捏唔到！」又想到軒公家拜年，只怕屆時忙於謝票：「希望唔止軒公封利是重手，連結咗婚嘅Fans都派大利是畀我哋啦！」