毒舌大狀︳拍住黃子華打官司 楊偲泳演技被讚擺脫「張振朗女友」標籤

黃子華擔綱嘅《毒舌大狀》成為今年賀歲片之冠，票房已經超越6500萬。片中與黃子華飾演嘅林涼水並肩作戰嘅女大狀方家軍，由前ViuTV女藝人楊偲泳（Renci）飾演。Renci嘅表現亮眼，有份參演嘅谷德昭更加大讚Renci演出恰到好處。入行8年嘅Renci終於憑自己實力為人記起，而唔係因為佢嘅戀情先至見報。

29歲嘅楊偲泳2015年因為拍JW《矛盾一生》MV而為人認識，翌年加入剛開台嘅ViuTV，獲委派參與主持綜藝節目SE7EN，同時亦有拍劇。因為身材出眾，楊偲泳曾被傳媒封為「豐滿版陳妍希」。Renci試過拍SE7EN第2季節目參加飛行比賽時，懷疑因為撞親頭而短暫失憶。Renci 2020年同Viu完約後，轉投古天樂旗下嘅燊天，並開始接拍電影，喺《喜歡你是你》中飾演女同志，同戲中愛人談善言更有激吻戲。

演出機會keep住有，但最令人記得嘅係喺2019年仍然係ViuTV藝人嘅楊偲泳，被爆同TVB力捧嘅張振朗發展戀情，而張振朗亦承認同Renci蜜運中，十分坦白。二人多次被拍到互訪對方寓所，拍拖初期又已經見家長，近期仲一齊外遊，似乎感情生活相當穩定。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！