江嘉敏認戀電競公司高層有米男友大起底！

東方新地 - 娛聞

2021年3月15日上午4:00·8 分鐘文章

26歲TVB小花江嘉敏，入行以來緋聞多多，近日被安排與死敵馮盈盈合體，主持綜藝節目《解溝心機女》，節目中與馮盈盈暗片，不過現實中，江嘉敏似乎比馮盈盈幸福，與其電競公司高層有米男友恩愛，早前便被直擊二人甜蜜抱抱，真係甜到漏！

撰文：東方新地圖片：新傳媒圖片、江嘉敏IG、Anthony Facebook、Anthony IG

男友投訴︰是你大褸太重還是…

江嘉敏近排新聞多多，早前曾被指背住電競公司高層男友Anthony，疑似偷食男友嘅好朋友X先生嘅新聞被翻炒而嬲爆，搞到佢要喺IG發文表達不滿！不過，去年聖誕節，江嘉敏已放下怒氣，喺IG大晒同男友拍拖行街嘅合照，男友仲懶理途人目光，以「公主抱」抱起佢，而江嘉敏亦好識做，即時樹熊上身依偎在男友臂彎內，又頭貼頭深情互望，畫面羨煞旁人！不過，Anthony之後竟敢投訴女友好似肥咗唔少，江嘉敏留言話：「𝐶ℎ𝑟𝑖𝑠𝑡𝑚𝑎𝑠 𝑖𝑠 𝑐𝑜𝑚𝑖𝑛𝑔﹗大褸終於出動了！見到聖誕樹，忍不住要合照一下，感覺好幸福。剛巧合照站在蝴蝶結下面，我們都是互相的禮物吖！臨走時，他說了一句：『是你大褸太重還是……』！」

男友做阿四

本刊曾全程直擊江嘉敏搵男友幫手搬屋，當日約早上十一時許，只見Anthony 在村屋外指示搬運工人搬嘢上貨車，江嘉敏則留在屋內打點，全程點男友做阿四，Anthony 來回十多次搬雜物及清理垃圾，搞了兩個多小時，傢俬雜物塞滿成架貨車，男友搬搬抬抬十幾轉都依然咁冧，無他，姣功耍家的江嘉敏，搬搬吓嘢，可以冧男友玩畫手仔，只見 Anthony 摸著江嘉敏手仔寫字喺手掌，之後她又撒嬌要寫埋一份，江嘉敏捉住男友手臂寫嘢時，Anthony 更合埋眼極之享受，似乎女友姣功已經令他無法抗拒。

大件傢俬床褥有搬屋工人幫手搬，Anthony則幫手攞燙衫板等雜物放上自己私家車。

忽然撒嬌扭抱

之後江嘉敏坐男友的寶馬座駕，跟在貨車後面一同出發，去到太子道西新居，男友先將座駕泊到自己寓所停車位，再同江嘉敏前後腳返新居執嘢。晚上九時，兩人執嘢執到肚餓，一齊行去九龍城搵餐廳醫肚，江嘉敏全程戴上口罩唔想畀人認出，兩人連行去食飯都好癡纏，近六呎高的Anthony全程搭著女友膊頭行，又幫女友孭住手袋，行到路口，江嘉敏忽然撒嬌扭抱，Anthony竟唔理路人注目將她成個抱起過馬路，江嘉敏姣功果然名不虛傳！

Anthony對女友照顧無微不至,行街仲幫女友孭埋手袋, 行到去路口,女友突然撒嬌話攰扭抱,他更man爆將女友成個抱起過馬路,江嘉敏腳撐撐,搞到男友鬼咁high!

搬屋靠晒朋友,江嘉敏負責發號施令,但竟然要求全程主力搬搬抬抬嘅男友為她按摩膊頭。

《親親我好媽》江嘉敏

現年26歲江嘉敏中學讀嘉諾撒聖心書院，江嘉敏自17歲已瘋狂拍私影同接拍微電影，而佢喺《親親我好媽》中飾演江美儀大女，一位17歲學生妹，因爲演技自然而大受好評！江嘉敏戲内係一位乖巧文靜，品學兼優的學生，真心純過蒸餾水！佢喺劇中同何廣沛嘅感情線，更是觀眾至愛情節！江嘉敏更憑《親》獲提名頒獎禮女配角，對入行年資不算長的她來說相當鼓舞。