港姐複試︱爆炸頭繼續見人 佳麗戰鬥格騷事業心
《2022香港小姐競選》今日(7日)假將軍澳電視城進行佳麗複試,上次令人「驚」艷嘅「重慶綺夢」Atlia、「旗袍大媽」Rain、「肥美人」河北佳麗Blaire均未再見影,似係已經被Foul。不過上次見過人嘅爆炸頭佳麗Astrid及好友錢佩函均再次見人,今日二人亦一樣孖住出巡,兩個手挽手似係好姐妹,亦皆操普通話,當中錢佩函驚現「排骨胸」,真空上陣嘅佢以一襲低胸紫裙示人,心口胸骨凸出,身形瘦削但勝在身高取勝。
另外,今日亦見多位佳麗以超短裙、Deep V等戰鬥格攻陷電視城,好似以鮮紅低胸裙上陣嘅Erica上下齊露;嚟自北京嘅「山寨湯唯」Bohemia就着上胸前打交叉嘅全黑連身短裙,佢同時都係新進嘅「篋神」一族。加上上次「大篋神」Jane,佢亦繼續拖住個巨型篋到場,相當狼狽,佢現身時又剛巧喺林卓錡身後,似足對方助手,加埋27歲KOL Cherry,成今次複試「篋神」三劍俠。