港島搵食團 IG大熱打卡店

港島區嘅朋友仔搵食唔使頭痕，無論你係港島東定港島西都有餐廳介紹返畀你。兩間都好貼合時下最興嘅飲食潮流——又要好食又要打卡。一間簡約木系風、一間鮮明單色主題，兩種截然唔同嘅風格，但同樣值得拜訪。

Peko Peko Eatery （太古）

喺荃灣同何文田均有分店嘅呢間Café，最近進駐港島區，喺太古都開咗間分店，裝修走日式木系風格，仲有幾個好似洞穴咁嘅卡位，私密度高，深受食客歡迎。

Stone Fruit Salad

大部分追求健康嘅朋友仔，特別係想減肥嘅女生，而家去餐廳都好鍾意叫沙律食。呢個沙律以秋冬時令嘅生果做主角，包括有無花果葡萄、蜜桃、車厘子、布冧等，有爽甜多汁嘅，亦有微酸嘅，全部都好新鮮。另外配埋巴馬火腿同埋橄欖油、黑醋一齊食，味道豐富。

布里芝士 配 酸種麵包

布里芝士係種非常柔軟嘅芝士，奶味香濃。師傅仲要預先將芝士焗熱，變成半溶狀態，方便搽落酸種麵包度一齊食，啖啖芝香。配搭嘅合桃同菜蔬都有焗過，加埋以紅酒醋燴嘅櫻桃茄，酸酸甜甜，特別開胃。

主食

餐廳有多款主食選擇，其中呢2款都相當受歡迎。扇貝明太子意大利麵用咗勁多明太子加忌廉醬製作，煮到出嚟呈粉紅色，愈望愈有少女心。明太子本身自帶鮮味同鹹香，加埋煎香咗嘅扇貝同魷魚同樣鮮味十足；海膽三文魚籽竹炭烏冬則選用由北海道運送到港嘅海膽醬，勁creamy。而海膽就係嚟自加拿大，帶有微甘。竹炭烏冬都幾索汁，滿滿鮮味。

釀海鮮南瓜批

海鮮控必選。師傅先將比拳頭大少少嘅南瓜挖肉，蒸熟後再放入松露薯蓉、海蜆、青口、魷魚同帶子等海鮮，加埋mozzarella芝士一齊焗，面頭仲有三文魚子添。賣相吸引，份量十足，薯蓉同南瓜兩者都好軟滑，但都係飽肚嘅食物，所以最啱就係多幾個朋友share一齊食啦。

烤乳豬捲

呢道菜絕對可以話係驚喜之作呀。嚟自越南嘅乳豬仔，師傅首先將佢起晒骨，再加入茴香、香草 、西芹、洋蔥等配菜同埋cajun粉，捲好後蒸熟，切開備用。到接到客人order後先至再以200度高溫燒製，難怪肉質軟嫩之餘，層皮依然可以保持脆卜卜。

MONMONO（中環）

只要你最近行經中環士丹頓街，一定會對呢間以單色藝術作主題嘅餐廳留下深刻印象。由門面到內部裝修甚至餐桌等，統統都選用咗黃色，同佢哋喺山林道嘅本店如出一轍。不過兩間餐廳嘅定位同供應嘅食物都有啲唔同，本店係casual dining啲，中環呢間就係fine dining。晚巿暫不設單點，供應6道至8道菜晚餐。

安格斯牛肉薄切

餐廳選用嚟自美國嘅安格斯牛，Ribeye Cap嘅 位置，貪其口感同味道平衡有道，又唔會太肥但又可以有少少脂肪，而且冇筋，牛肉先經煎封再冷藏，所以食起上嚟好軟滑。仲有陣陣肉香。建議可點埋側邊嘅汁醬同果仁一齊食，使層次更豐富。 牛肉中間似蛋黃嘅汁其實係熱情果油醋汁嚟，點一點，酸酸地好fresh。

自家製雞油菌意式餛飩

自家製嘅餛飩皮薄餡多，全部都係由師傅一手搓皮一手包成。Size細細隻，一啖一隻啱啱好。不過雖然細隻，但餡料依然十足，用咗白菌、牛肝菌同雞油菌製作㗎，牛肝菌味較濃，而雞油菌則有淡淡香味，各取所長。面頭仲刨埋絲絲巴馬臣芝士，帶出鹹香。

赤甘鯛立鱗燒

季節限定菜式，仲要係叫7道菜或8道菜嘅套餐先有得揀。赤甘鯛立鱗燒配日本大根同日本煎茶魚清湯，師傅以獨門秘方令到魚鱗逆向穩立，再慢慢一殼一殼油咁淋熟佢，而唔係放落鑊炸熟。師傅解釋雖然功夫多咗，但就可以令到魚肉保持嫩滑，而且冇咁易乾身。食落非常脆口，卜卜聲咁，仲有啖啖魚肉鮮香。

日本A4和牛二食

牛魔王最期待嘅菜式，又真係幾值得期待嘅。選用日本宮崎縣和牛牛柳同西冷兩個部位，並以兩種方式處理。牛柳就用紫菜同紫蘇葉包住，製成天婦羅，配埋黑蒜汁同炸蒜片，雖然每樣配料食材嘅味道都好濃郁，但混埋一齊食又幾夾，而且更能突顯肉香。至於西冷則簡單煎香，配搭新鮮刨嘅wasabi同埋南瓜蓉，有助解油膩感。但重點其實係側邊嘅室溫黑椒汁，辣度溫和。

疏乎厘卷蛋

留意返呢道甜品係午巿套餐先有得食嘅。疏乎厘卷蛋配杏桃雪葩，口感軟熟濕潤，陣陣蛋香，食完有種滿足感，感覺就好似為餘下嘅半晝叉足電一樣。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異