炎明熹姚焯菲聲夢四小花組女團After Class 平均年齡15歲對戰造星女團？

一班聲夢學員喺參加TVB歌唱比賽《聲夢傳奇》時累積一定人氣，TVB先後爲炎明熹（Gigi）、姚焯菲（Chantel）派台個人單曲。早前有消息指姚焯菲、鍾柔美（Yumi）、詹天文（Windy）及六強之一文凱婷（Aeren）將組成女團出道，並早喺9月份以呢個四人姿態為《兒歌金曲SUMMERFEST》表演，但好多網民都表示文凱婷似乎同其餘三小花感覺唔係好夾，都係希望炎明熹同三小花組成組合。未知TVB今次係順從民意定早有安排，前日（27日）突宣佈炎明熹、姚焯菲、鍾柔美、詹天文組成四人女子組合「After Class」，並公開歌曲《要為今日回憶》MV正式出道，比《全民造星IV》更快打造女團。

After Class平均年齡僅15歲，以青春淘氣風格為主，《要為今日回憶》以「四個識於微時的輕熟女姊妹」故事為題，由Larry Wong作曲、林若寧填詞、舒文監製；講述四個女孩試過互相扶持、擁抱痛哭、爭執冷戰、形同陌路、久別重逢，去到今日帶住幸福微笑哭訴美麗回憶。MV發佈至今（29日）已累積逾16萬觀看次數，網民亦大讚MV中見到四個純真少女真摯互動，充滿青春氣息。

噚晚（28日），After Class就係《星光熠熠耀保良》紅館舞台上首度獻唱新歌，雖然鍾柔美與詹天文事後表示互相掉亂咗支咪，搞到耳機聽唔到自己把聲而唔係好滿意表現，但唔少網民都力撐，指其實表現好穩定，四個人把聲合埋一齊好好聽，希望佢哋繼續加油努力。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！