帶爸爸食餐好！父親節酒店級中菜集合

母親節過完無耐，話咁快星期日就係父親節喇！想盡孝心同表達謝意，一於帶爸爸食返餐好慰勞下佢哋。今年介紹五間酒店級中菜畀大家，間間都好豪華，為爸爸送上咁窩心嘅節日禮物，爸爸食完一定甜入心。

米芝蓮二星食府 天龍軒

連續10年蟬聯米芝蓮二星嘅中菜廳，認真唔簡單！今個父親節餐廳推出六道菜盛宴，頭盤包括桂花蜜汁叉燒、番茄蓉炸鱔片及芝麻凍海蜇緊，味道清新食完好開胃。小菜方面鮮鮑小炒皇鑊氣十足，鮑魚大大隻新鮮彈牙；上湯百花釀焗虎蝦皇，虎蝦皇好成手掌咁大隻，釀入彈牙蝦滑及加埋上湯，口感同味道都更上一層樓。最後以馳名嘅薑味魚湯花膠煮糯米飯及甜品椰漿香芋紫米露、 芝士炸煎堆仔及傳統酥皮蛋撻作結，食完一定好滿足。

藤椒蘆筍煎 M9 和牛 文華廳 

一樣係米芝蓮奪星中菜，父親節菜單由中菜行政總廚黃永強師傅主理，可以品嚐一系列點心、特色小菜及滋補養生湯等。金湯燴官燕好足料，食完真係夠晒滋補。呢道藤椒蘆筍煎M9和牛都好有特色，M9和牛油花重有牛香就唔使講，加埋藤椒嘅香氣錦上添花，唔會蓋過主角和牛味道。餐廳仲有供應父親節午市菜單，除咗小菜同湯品仲有黑魚籽乳豬件、西班牙紅蝦小籠包、黑松露野菌餃三款點心！

創意粵菜 南坊

以傳統口味混合創意帶畀食客無盡驚喜嘅創意粵菜，頭盤包括黑毛豬叉燒皇及風沙脆皮法國田雞腿等；湯品係姬松茸花膠螺頭燉太和雞，好濃郁。主菜有五款，推介海鮮濃湯燴大蝦球配家鄉煎脆米粉，大蝦球好鮮美，中式家鄉煎脆米粉配上西式海鮮濃湯估唔到咁夾。豉油雞平時成日食，呢度嘅三黃豉油雞用上沖繩黑糖及玫瑰煮成，甜味更自然帶淡淡花香，好出色呀。溫馨提示一定要早兩日預訂！

九道菜父親節套餐 玉庭

呢間中菜推出九道菜父親節套餐，選用優質食材，質素一定唔會令人失望。主菜推介包括琥珀火龍果燕麥炒玉帶珊瑚蚌及原隻八頭湯鮑魚佛跳牆撈飯等。前者珊瑚蚌口感好爽脆，配埋酸酸甜甜嘅火龍果又幾清新。後者呢用八頭鮑魚製成嘅佛跳牆撈飯，又點會唔好食～金蒜銀絲開邊蒸鮮活波士頓龍蝦都唔可以錯過，波士頓龍蝦多肉鮮甜，配埋金蒜就更惹味喇。

至尊父親節盛宴 富豪金殿

如果爸爸鍾情傳統粵菜同海鮮嘅呢間就啱晒喇～包括老陳皮紅棗雲耳蒸金沙巴龍躉，龍躉嫩滑鮮甜，老陳皮嘅香氣恰到好處！鍾意食蟹嘅可以喺陳年花彫蛋白蒸泥蟹或薑蔥粉絲泥蟹煲中二選一，前者蟹肉嘅鮮味滲晒入蛋白中，啖啖都係蟹味，推介！另外仲有雲彩珍菌大元貝、 雪棗蟲草花螺頭燉雞及瑤柱鮑甫鮮菇燴海參等心機菜，值得一試！

文: Yanica