牛扒店副線轉開實體糖水店 尖沙咀開業 必試開心果露+D24榴槤冰

由賣牛扒轉賣糖水係咩玩法？咁可能要問問研香嘅老闆們啦。今年年頭嗰陣，第5波疫情嚴峻，以主打牛扒同任食薯條而深受歡迎嘅Top Blade Steak Lab就開多條副線賣糖水，當時仲係得某幾區先有團購，想食到佢哋嘅祖傳秘方同限定開心果露都唔係咁易。不過而家有好消息啦，佢哋最新喺尖沙咀開設實體店，除咗熱賣嘅5款糖水外，更增設3款鮮果冰同茶餐多士！

糖水店特意購入意大利產嘅石磨機，每種糖水都使用全天然果仁製作，就好似開心果露咁，如果成日四出搵開心果甜品食嘅朋友仔，嚟到一定要試。佢哋選用意大利西西里島嘅開心果製作，雖然唔算話非常杰身，但就有香濃嘅開心果味。熱食凍食嘅口感同風味都略有唔同呢。

至於招牌芝麻糊，聽過之前團購客人們嘅意見後，配方經過改良，用上3款芝麻，當中包括不計成本新加埋嘅日本金芝麻。烤香3款芝麻後，用石磨機慢磨8個鐘，然後再煮成糖水，無論係香氣定味道都比以前更為濃郁。3款芝麻中，以黑芝麻嘅比例用得最多，主取其色；白芝麻則取其味，而自帶甘香嘅金芝麻，香味同油脂都相對較多，加埋一齊就有助提昇整體感覺。

新增嘅鮮果冰好吸引，有龍眼、芒果同榴槤3款。雖然開始涼涼地，但最推介一定係榴槤冰，混合咗D24同金枕頭兩款又香又濃味嘅榴槤，啖啖都係甘香嘅真‧榴槤果肉，好足料。仲要有水晶珠豐富口感。芒果冰則選用呂宋芒，好清甜呢；至於龍眼冰，一碗有成廿粒龍眼好滿足。

茶餐有3款多士可選，花生醬、開心果醬同芝麻醬。自製嘅開心果醬色澤深綠，睇住店員搽包嗰陣，傳出陣陣香味，味道就較為淡身，不過有啲開心果碎撒喺面頭，口感又豐富返。

研香

地址: 尖沙咀厚福街7號地舖

文：Kar

相、片：Yan Yan