牧野家族｜容祖兒北上搵銀 為節目不惜食豬糧惹熱議

近年主攻內地市場嘅樂壇天后容祖兒（Joey），上年憑綜藝節目《乘風破浪的姐姐2》人氣急升。工作浪接浪嘅Joey，經常現身各大小綜藝節目，最近出演內地綜藝節目《牧野家族》，最新一集佢要為豬仔「豬福」炮製早餐，不過佢竟然忍唔住食埋一份，仲要食到點晒頭，引起網民熱烈討論。

喺《牧野家族》中，節目組安排容祖兒照顧一隻兔仔及一隻豬仔，而最新一集就講到Joey要好好照顧豬福，只要節目組監察到豬福係開心嘅話，Joey就可以兌換物品。Joey首先為豬福炮製早餐，了解完豬仔鍾意食啲咩後，佢就決定用「水面粉」嚟煮早餐。喺煮「水面粉」嘅時候，佢已經忍唔住話：「好像挺好吃的！」。

雖然呢個早餐嘅賣相唔係幾討好，不過豬福就似乎非常滿意，就連加咗藥喺入面都唔知。之後，容祖兒唔知係咪見豬福食得好開心，佢竟然話要食埋一份，而節目組亦表示震驚問：「你確定？」，之後Joey竟然話點解唔可以，覺得係可以食嘅。雖然Joey坦言話有少少緊張，不過佢都係有食豬糧，食完一啖後佢唔係放低隻碗，而係食完一啖又一啖，好似好享受咁。Joey仲對住鏡頭話佢呢幾日唔使換物品，佢食豬糧都可以。

之後，容祖兒為咗可以令豬福開心，佢就喺戶外唱歌仔俾豬福聽，期間佢唱咗《麥兜與雞》及《友情歲月》。而節目組監察到豬福好開心，所以Joey成功兌換到兩件物品。

節目出街後，容祖兒食豬糧嘅片段引起網民熱烈討論，有網民認為佢冇天后架子同好可愛，留言話「容祖兒真的非常的可愛，吃貨本性暴露無遺，對小豬的早餐都很有興趣」、「真沒想到姐姐這麼可愛的」、「鵝子，不要有太多離譜的好奇心好嗎，請時刻記得你是天后！！！」、「這完全就是一個搞笑女」及「我真的被她笑死了，好煩啊，你吃就吃唔什麼」等等。不過同時亦有網民認為有劇本，呢個節目效果未免去得太盡。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！