獨家專訪:樂壇大執位 吳業坤做一哥 周柏豪離巢 外闖霸地盤

周柏豪強調與無綫關係友好,不排除再合作,亦會繼續製作廣東歌。
周柏豪強調與無綫關係友好,不排除再合作,亦會繼續製作廣東歌。

新一年甫開始,樂壇即大執位!除穩坐「TVB Music Group一哥」位置的周柏豪離巢外,連「繼位」的胡鴻鈞亦萌生去意,令一度被傳是「棄將」的吳業坤「遲嚟先上岸」升呢「新任一哥」。柏豪受訪時直認與無綫結束6年賓主關係,據知他希望有更大自由度全力向外闖。

一元復始,樂壇也萬象更新。李幸倪強勢加盟英皇後,曾連續兩年奪無綫「最受歡迎男歌星」的周柏豪亦有新路向,日前推出全新廣東歌《小船大海》及國語歌《敬老爸》,但其社交網只tag了經理人公司,未有tag「TVB Music Group」(TMG),令人揣測他跟無綫關係有變。

前日柏豪接受本報專訪,大方承認跟TMG約滿,強調並非不歡而散:「只有唔捨得,呢6年合作得好開心,識咗好多無綫前輩同年輕演員,好似黃翠如咁。」現年38歲的他表示是時候跳出舒適圈作新嘗試,與無綫關係友好。對於有指他與「無綫家嫂」王敏奕合演的新劇快將播出,他說:「如果發覺獨立發展好攰喎,而咁啱有好劇本、好角色咪再合作囉。」

內地成績亮眼

其實離開無綫,跟柏豪欲擴大其事業版圖有關。事關在3年疫情下,他隻身到內地的成績亮眼,9個月內先後參與《聲生不息》、《披荊斬棘》、《大灣仔的夜2》等共5個綜藝節目,還有大量商演及廣告等,除收入增加外,連眼界也大開,他說:「唔係比較,只係其他地方冇內地嗰種氛圍,好似拍《披》咁,30幾個來自唔同界別嘅『哥哥』一齊發揮所長,令我學到好多嘢。」最令他開心是結識了不少朋友:「我以前係好難識到朋友,來來去去都係同連詩雅。」

他直言在內地每天工作16小時,付出有回報:「10年前已經喺廣東省搞簽唱會,但再遠啲地方嘅人未必識我,不過拍《大灣仔》嗰陣,每次去唔同城市,遠到去黑龍江、青島、廈門、杭州。」雖然工作開心,但要犧牲和家人相見時間:「我個仔17個月大,但我去咗12個月,啱啱返屋企時,個仔跑過嚟攬住我,但感覺唔係感動而係驚奇,因為我走時,佢連企都唔識。」又稱為爭取時間和家人見面,有時會出蠱惑:「拍嘢時成日扮去廁所,或者唔食飯行埋一邊同囡囡視像,啲人話我開朗咗,可能唱得兒歌多有關。」他表示現不用隔離,可隨時起行返內地工作,但今個農曆新年會先陪家人,又強調不會放棄香港市場,繼續製作廣東歌。

傳胡鴻鈞有新發展

另外,TMG的官網上,除了柏豪被「除名」外,兩年前與他同奪「最受歡迎男歌星」的胡鴻鈞也「失蹤」,有傳他有新發展。至於在位女歌手分別有JW、連詩雅、吳若希、菊梓喬等,男歌手則有鄭俊弘、謝東閔、伍富橋,還有曾被傳與前高層何哲圖不和兼拒簽約的吳業坤,直至何哲圖離職後,坤坤去年正式加盟TMG,今年2月才推出頭炮新歌的他已升呢「一哥」。

昨日坤坤受訪時表示返港後不停錄音、開會及拍MV:「冇留意其他人動向,只知公司會投放好多資源,3月會不斷派歌,我冇睇重『一哥』呢啲事,年紀最大係我,不過亦係最遲加入,其實係小師弟。」而胡鴻鈞至截稿前未有回覆。

吳業坤謙稱最遲加入TMG,是同門小師弟。
吳業坤謙稱最遲加入TMG,是同門小師弟。