獨家探班:拳腳冇眼 男人最痛 郭柏妍火力十足 張振朗硬食撩陰腿

郭柏妍一副戰鬥格上陣!
郭柏妍一副戰鬥格上陣!

郭柏妍與張振朗拍攝練拳戲,掃腿時她不慎踢中「小朗朗」,幸而振朗有用護腕及攝手入內「護祠堂」!事後她嚇親謂:「我冇試過踢人哋嗰度,死嘞!我係咪真係踢到你?」振朗客氣謂:「有啲咩事都好,咩都擋晒㗎嘞!仲好有用㗎!」

藝人張振朗、郭柏妍(Rosita)日前於拳館為文偉鴻監製的無綫新劇《奪命提示》拍攝一場打拳戲,劇情講述振朗教Rosita打拳,Rosita打到攰想抖抖,豈料振朗卻說了幾句「潤」她,唔衰得的她轉頭狂揮拳起腳,不小心踢中「小朗朗」,痛到振朗掩住下體倒地狂縮。劇情好慘痛,但其實現場振朗都絕不好受。試位時,Rosita誤踢振朗膝頭哥,緊張問他有沒有事,振朗亦相當好,忍痛指沒事之餘,更讚她做得好,不過到拍攝踢「小朗朗」鏡頭時,振朗難免「淆底」謂:「我好驚啊!我仲要傳宗接代㗎!」隨即他塞護腕入褲襠掩護,正式拍攝時更將手放入褲內保護「小朗朗」,Rosita踢完後,他不禁謂:「都有啲力㗎喎!」而Rosita雖然弱質纖纖,但拍攝時她出盡力揮拳、掃腿,香汗淋漓,相當落力,穿着露腰衫及短褲的她騷纖腰露長腿,甚有睇頭,不過其雙腳都留下不少瘀傷。

事後兩人齊齊接受訪問,振朗被問到拍攝前有否為「小朗朗」作心理輔導時,他笑言:「我已經將成個人交咗畀劇組,每次做足安全措施,所以頭先都冇受傷。」相反Rosita就相當緊張:「我好驚踢到你,所以對咗好多次位,因為我冇試過踢人哋嗰度,不過我睇Playback時最後一下真係好真,死嘞!我係咪真係踢到你?我又唔肯定喎!」問到是否真的有踢到「小朗朗」時,Rosita仍不肯定謂:「我唔知呀!」振朗即說:「好在師傅叫我攝隻手入去擋住,有啲咩事都好,咩都擋晒㗎嘞!(攝隻手安心啲!)梗係啦!仲好有用㗎!我仲要有啲子子孫孫。」

Rosita指近排多了健身,亦為了這場戲去打拳:「原來嗰碌柱係好硬,教練係咁叫我大力踢,踢到瘀晒。」說時大家忍不住笑,問她究竟是哪碌柱,振朗笑謂:「咪係囉!泰拳嗰個叫沙包。」她尷尬謂:「我覺得佢好大舊,所以唔識點形容。」振朗之後都有不少動作、開槍戲份,他指已做足準備:「依家睇《隱形戰隊》都好犀利,內地豆瓣有8.2分。而我哋套劇喺廠拍一場動作戲要3日,好細緻!」Rosita又指劉佩玥及劉穎鏇都好吸睛:「女仔睇到都會心心眼。(你使唔使都要好性感?)到時就知嘞!依家唔會食咁多,因為啲服裝都好清涼,要減磅先!」

與丁子朗拍劇做情侶

此外,說到之前去音樂節被指送親手整的頸繩給丁子朗時,她謂:「其實我屋企都有一條,所以唔明點解話我送畀佢,場地入面個個都有一條,好似Souvenir咁。(你哋係咪真係拍緊拖?)我哋係朋友,喺套劇入面我哋就係拍緊拖,係情侶嚟!(佢有冇機會?)套劇入面都好有機會發展到,劇本仲出緊,我都好緊張劇情點發展!(即係劇以外未有機會?)劇以外就係好好拍緊劇入面嘅嘢!」而丁子朗亦大方跟Rosita合照,他笑謂:「係人都有整㗎,嗰條係我整畀自己嘅。」他又透露日前拍了一場綁架戲,要吊威吔做空中蜈蚣彈,難度甚高,問他有否過兩招給Rosita時,他謂:「今日有咁多人指導,佢個角色有啲笨拙!(咁平時笨唔笨拙?)我唔知喎!」

郭柏妍一腳踢中「小朗朗」。
郭柏妍一腳踢中「小朗朗」。
張振朗即掩住下體倒地。
張振朗即掩住下體倒地。
直言好驚的張振朗,將手放入褲內保護自己。
直言好驚的張振朗,將手放入褲內保護自己。