獨家探班:煞科大打出手 自封「深水埗謝霆鋒」 張敬軒5位數勞軍氹番王菀之

張敬軒與王菀之合作拍戲,揚言冇鬧交!
張敬軒與王菀之合作拍戲,揚言冇鬧交!

藝人張敬軒(軒仔)新片煞科,出動5位數字「勞軍」,氹得拍檔王菀之(Ivana)「心情好番晒」。提到兩人的對打場面,自封「深水埗謝霆鋒」的軒仔為Ivana改名「牛池灣楊紫瓊」,令人忍俊不禁。

軒仔「久休復出」影壇之作《超神經械劫案》近日迎來殺青,經過約兩個月的拍攝,台前幕後合作得相當愉快,對即將各散東西大感不捨。開工時軒仔變身「萬歲王」,經常請大家「食好嘢」振軍心,而煞科當日他再費心思,花上5位數字請來街頭美食「雞蛋仔」及「夾餅」團隊到訪片場,為一眾拍檔提供熱辣辣甜點,結果深受製作團隊歡迎,頻頻大排長龍。而軒仔與Ivana趁機偷師,大讚自己的「出品」脆卜卜!

「小心我落咗毒!」

據悉,煞科日拍攝軒仔與Ivana對打場面,電影公司要求保密以防劇透。兩人大讚武指團隊細心,連場打戲即使再簡單的動作,亦很小心處理以防萬一。軒仔笑指一直很期待這場殺青重頭戲,又自封「彩虹甄子丹」及「深水埗謝霆鋒」,更搞笑以「牛池灣楊紫瓊」來稱呼Ivana,他們笑說:「總之魏浚笙同楊天宇啲打戲,都只係拍得住我哋咁啦。」談到首次合作拍電影有何難忘事,Ivana笑答:「冇鬧交,我哋感情仲幾好,只係拍攝過程受天氣影響,試過冒雨都要趕進度,比較難拍啲囉。知道佢今日萬歲雞蛋仔,我好開心,心情返晒嚟嘞!」軒仔聞言即駁嘴:「小心我落咗毒呀!」場面爆笑。

完成電影拍攝後,軒仔緊接將投入演唱會綵排,他透露暫時未有邀請嘉賓的打算:「會唱好多上次演唱會未唱過嘅歌,而完成演唱會後應該都冇息休,因為要忙《超》片上映宣傳。」Ivana即接口:「咁到時我喺屋企支持你啦!」對於成功入圍角逐「第三十三屆國際流行音樂大獎」,卻遭拿來與MIRROR比較,軒仔坦言不欲多作回應:「我唔係好鍾意咁樣比較,真係冇乜意思,所有嘢唔係我哋自己講,市場自然會有公論。」

另外,軒仔日前宣布將於12月20至1月2日於灣仔會議展覽中心舉行10場由英皇娛樂主辦的《Revisit張敬軒演唱會》,並公開了個唱海報。見他難得以搶眼藍綠髮色示人,又包起大型機艙拍攝,製作相當認真。誰知有網友發現軒仔整個造型竟然與韓國男子天團防彈少年團成員V的舊造型相似,網友更發現兩人同樣都以藍色頭髮加粉紅色西裝上陣,造型極為相似,不過軒仔則以銀色長褲配襯,而V則是全身粉紅色示人。

兩人攞住架生偷師,更大讚自己的「出品」脆卜卜。
兩人攞住架生偷師,更大讚自己的「出品」脆卜卜。
美食深受製作團隊歡迎。
美食深受製作團隊歡迎。