獨家消息:撒網發掘「炎明熹2.0」《聲夢2》升級海外揀蟀 譚俊彥飛馬國助攻

「視帝」譚俊彥對唱歌有濃厚興趣,不時自彈自唱。
「視帝」譚俊彥對唱歌有濃厚興趣,不時自彈自唱。

無綫節目《聲夢傳奇2》正在錄製當中,繼去年成功捧紅多位新進歌手後,今次無綫決定「升級」,搞埋馬來西亞區《聲夢2》,精選當地的超班好聲之人,準備隨時「過江」與香港區代表比試,並會派藝人前往當地參與節目,視帝譚俊彥更會獻唱「加持」!

去年的《聲夢傳奇》成功捧紅多位新人,3料冠軍炎明熹成為「TVB驕傲」,現時更爆紅到內地,前途一片光明;「國民初戀」姚焯菲成功出位,拍廣告又拍劇;另有多位成員亦各有發展,證明節目相當成功!

今年的《聲夢2》將於6月11日首播,更會「升級」衝出香港,舉行馬來西亞區海選,並已於5月較早時間開始招募,參賽者年齡介乎18至30歲,要求以粵語及華語溝通,擁有唱歌技巧及舞蹈才華。決賽及總決賽暫定8月在馬來西亞播出,勝出的優質「過江龍」或有機會前來與香港區參賽者對戰。

師兄師姐做嘉賓

為了隆重其事,無綫將於6月底安排今年初勇奪馬國視帝的譚俊彥、參加無綫歌唱比賽《超級巨聲》入行的周志康、曾是音樂組合「少女標本」成員的簡淑兒,以及上屆《聲夢》成員文凱婷及何晉樂(Rock)飛到馬國撐場,以嘉賓身份表演。

譚俊彥向來熱愛自彈自唱,問到屆時會唱甚麼歌,他說:「我其實未知唱咩,依家喺內地拍劇,一有時間就喺房彈結他、唱歌,好多公餘時間畀我練習,到時應該問題不大。不過,始終個劇都拍咗好耐,由1月到依家,差唔多要返嚟喇,我都好掛住啲小朋友。」

簡淑兒加緊練歌

久沒唱歌的簡淑兒坦言要練歌,她說:「好耐冇唱歌,真係要再練一練。(揀咗歌未?)都未,到時可能會有合唱。我好耐冇過馬拉,有啲喺嗰邊嘅同事知我會過去,話帶我出去食好嘢,希望到時做完嘢有時間出去食嘢,當去咗個旅行咁啦!」

至於唱而優則演的周志康,很開心有機會再踏上舞台唱歌,他說:「今次係第2次去馬來西亞工作,終於可以去嗰邊見吓Fans,之前做直播都只係喺網上接觸佢哋。」又表示太久沒出埠,希望可以寓工作於娛樂,周圍食吓行吓。問到覺得「聲夢幫」與多年前的「巨聲幫」有甚麼分別,他說:「大家都係同一心態,就係演繹好首歌,最緊要享受舞台。可以喺歌唱比賽以前輩身份表演好開心,我真係好鍾意唱歌,可以喺舞台唱已經好滿足!」

去年的《聲夢傳奇》發掘了多位新星,冠軍炎明熹最近更在內地爆紅!
去年的《聲夢傳奇》發掘了多位新星,冠軍炎明熹最近更在內地爆紅!
簡淑兒曾是組合「少女標本」成員,但已丟低唱歌多年,要急急惡補。
簡淑兒曾是組合「少女標本」成員,但已丟低唱歌多年,要急急惡補。
近年主力拍劇的周志康,很高興可以重踏舞台獻唱。
近年主力拍劇的周志康,很高興可以重踏舞台獻唱。