獨家消息:《獎門人》無罩式錄影 陳山聰收工確診 黃智雯抹嘴高風險

陳山聰玩遊戲時狀態大勇,未呈病態。
陳山聰玩遊戲時狀態大勇,未呈病態。

無綫總經理曾志偉領軍的節目《開心無敵獎門人》前晚錄影,陳山聰、袁偉豪與黃智雯等有份參與,無奈山聰錄影後覺得身體不適,進行快速檢測證實確診!各密切接觸者即收到通知,要即時做快測,慶幸全部人未有中招。山聰現居家隔離,其2歲兒子未受感染,而《獎門人》昨晚仍「無罩式」繼續錄影。

「Crazy Runner」成員陳山聰、袁偉豪、黃智雯、胡蓓蔚等前晚錄影無綫節目《開心無敵獎門人》,同場的還有《愛.回家之開心速遞》演員滕麗名、呂慧儀、單立文、蘇韻姿,主持曾志偉、錢嘉樂、阮兆祥及麥美恩跟眾星大玩遊戲,期間山聰玩「用口接食物」遊戲時成面污糟,黃智雯與胡蓓蔚即幫他抹嘴。

居家隔離 封閉式7日

節目錄影完畢,山聰開始覺得不適,即在家進行快速檢測,結果證實確診。由於錄影期間所有藝人均沒戴口罩,故全部屬密切接觸者。而「中招」的山聰昨晚接受本報獨家訪問時坦言,當日錄影前因要拍攝劇集《美麗戰場》,故早上及下午開工前共做了2次快測,2次都顯示沒有確診:「係玩完《獎門人》後返到屋企開始覺得有啲喉嚨痛,再做快測先知中招,依家情況OK,居家隔離中,正面面對。(阿仔冇事?)我哋房有獨立廁所,阿仔同工人姐姐我哋會密切留意住,佢哋都冇病徵。我表哥係醫生,所以有問佢意見,佢教我哋點處理。我喺房封閉式7日,咁就應該好快好番。」

「唔會玩完即刻中」

問到知否從何感染?他說:「一定唔會喺《獎門人》度中,因為唔會玩完即刻中。尋晚返到屋企工人姐姐瞓咗覺,我哋都叫佢起身做快測。」他指自己有咳嗽和喉嚨痛,並已即時通知同場的「兄弟姊妹」做快測:「佢哋Check晒冇事,大家可以放心。」而袁偉豪與黃智雯均表示沒有中招,袁偉豪說:「我尋晚做咗一次,今日都去咗做核酸,暫時冇嘢,呢幾日會留意住。」

另外,袁偉豪前晚錄影時受訪,提到其妻張寶兒現於日本拍旅遊節目《45日環遊日本》,他表示:「太太唔喺身邊多咗時間做手藝嘢,都有忙自己嘅音樂、拍MV同錄音。」對於日本疫情反覆,問到可擔心太太?他說:「如果佢冇事冇幹返嚟就係奇迹,都有提佢要小心。(羨慕佢去旅行?)佢有問過我願唔願意做私人助理,幫佢影相,無奈我有好多工作處理。」而黃智雯透露剛以客席身份現身今屆訓練班:「見到啲同學仔幾有火,我本身怕悶,所以用玩遊戲方式同佢哋做分享,同佢哋講無論角色輕重都要珍惜每次演出機會,希望佢哋有一個好嘅心理素質。」

曾志偉率領眾星拍攝《開心無敵獎門人》,眾人均沒戴口罩錄影。
曾志偉率領眾星拍攝《開心無敵獎門人》,眾人均沒戴口罩錄影。
陳山聰用口接食物時玩到「一面都係」,胡蓓蔚與黃智雯上前為他抹嘴。
陳山聰用口接食物時玩到「一面都係」,胡蓓蔚與黃智雯上前為他抹嘴。
袁偉豪與黃智雯已做快測,證實沒有中招。
袁偉豪與黃智雯已做快測,證實沒有中招。