雅虎香港新聞 獨立書店專訪｜隱世「書少少」店長阿信的故事 屠房打工撐起兩舖 設借書服務
【Yahoo 新聞報道】元朗隱世書店「書少少」的角落，掛著電影《點五步》「輸嬴都係呢半步」金句T恤。一路走來，書店能夠撐到今天，嬴在店長阿信的堅持。書少少位於村屋的隱秘角落，也是阿信的家，讀者需預約才可到訪。因位置太隱蔽，他遂在元朗大馬路開設分店方便讀者支持。阿信需通宵到屠房打工，才能撐起兩舖，「每個月臨到最後幾日先知夠唔夠錢交租」。書少少為推廣閱讀不計成本，成為全港首間提供借書服務的書店，「借書呢樣嘢唔需要畀圖書館拎晒嚟做，我點解唔可以做？」
文字記者：盧珮瑤
攝影記者：朱永倫
「書少少」是區內唯一獨立書店，隱世分店實行預約制，讀者需與阿信預約時間，他會親自到元朗市中心迎接客人。「呢個係體驗嘅一部份，無乜幾可去書店個店長會陪你入去」。讀者至上的心態，是阿信在書店業打滾所學的寶貴一課。
書店打工取經 讓客人微笑進店
阿信的夢想並非開書店，而是出書。他從小愛寫作，10年前自資4萬元，將文章結集成書《世界末。愛小說》，印製300本面世。成為作者後，阿信反覆思量心血結晶的命途，「會成日諗本書會點，唔係佢賣得好唔好，係佢喺書店入面點、有咩人會睇到」。
阿信遂於2014年起於大小書店工作，高峰期一條彌敦道3間書店同時有他的足跡，「嗰陣無諗過自己開，總之有關書店嘅嘢都學咗先」。有大書店要求員工駐守店外迎接客人，正是他後來會親自接客人到書少少的原因，「對客人嚟講件事好莊重，佢行入間書店一定係帶住微笑」。
至2020年，阿信的多名相熟同事離職，促使他自立門戶，在元朗隱世角落創辦書少少。為節省成本，二、三百呎村屋半舖半居，亦是阿信的家，「我叫佢做『半實體實驗空間』，因為淨係開放一半，想畀自己試吓經營感覺係點」。
月入 2 萬撐起兩舖 「幾個月三餐食麵包」
半舖半居小天地開業一年多後，不少朋友都建議阿信搬到市中心，「佢哋見你咁有心做呢件事，想多啲人支持到」。於是書少少2021年5月在元朗大馬路開設另一分店，每天開業，但小店沒有讓人靜靜坐下看書的空間，因此隱世舊店周末仍然開放，「人哋用一間書店做到嘅嘢，我要分兩個地方」。
阿信形容，書本是讀者的情緒出口，堅持繼續營運隱世舊店，是為了讓讀者享有更隱密的閱讀體驗，「嗰度係一個無人知地址嘅地方，地圖上唔會搵到，呢個『出口』係再放大咗，更加有種好自在嘅感受喺度」。
為了應付生活和新舊分店的租金，阿信另一身份是屠房通宵搬運工人，「人工好奀，呢一間（市中心店）嘅租都唔夠冚」。現時屠房加上兩間書店總收入約2萬元，書店支出已佔1.8萬元，「每個月都係臨到最後幾日先知夠唔夠錢交租」。生活看似拮据，自言低物慾的阿信看得淡然，「一日3餐、食幾個月麵包都試過，但係唔係真係捱餓呢？又唔係無嘢食！我都唔知啲錢可以用喺邊，所以用晒落書店」。
全港首設書店借書服務
經營如此艱難，阿信仍不計成本推出特別服務：借書。他指台灣、馬來西亞均有書店提供借書服務，但香港不然，「啲人會覺得借得書人哋咪唔會買書；我反而覺得圖書館壟斷咗借書，我雖然賣書，但你借完返去睇，真係想keep本書你先買，唔好搞到二手書越嚟越多」。對生意影響不大之外，反而成為書店另一賣點，「啲人會同人講呢度有得借書，就算唔係買，都會想嚟睇下乜嘢地方會做呢件事」。
書店有3種借書卡可供選擇，包括3個月、半年和一年，收費分別為50元、80元及150元，購買全年借書卡買書時可獲85折優惠。借書模式與圖書館無異，讀者每次可借6本書，限期一個月。店內設有名為「理想的下午」的借書櫃，「如果有個理想下午，你會攞住咩書睇呢？我係依呢個方針擺書入去」。
小書店大願景
書少少兩店總藏書量僅約1,000本。主打台灣書籍，「台灣書嚟香港要一兩個月，我變相快其他香港書店兩三個禮拜介紹咗先」。阿信選書準則相當嚴謹，對繪本也甚有要求，「小朋友自己睇會有趣味，但大人可以睇到另一種故事；而家九成繪本都係好功能性，淨低一成就係做呢類」。
阿信希望可與區內小店尋求合作機會，「喺社區連結上，因為有咗呢度（市中心店）而多咗一個可能」，亦會舉辦分享會，與讀者談談兩年來書店的高山低谷。說到書店的願景，阿信以繪本《席薇亞的書店》作結。故事講述席薇亞（Sylvia Beach）創辦逾百年歷史的「莎士比亞書店」之進程，戰爭時期她拒向德軍賣書，最終入獄；她又向多位成名前的文學作家借書、提供食宿等，孕育文壇巨擘，「呢種先係一間書店為個地方去fight應該有嘅樣，我會視之為一個學習典範」。
【書少少 x 同渡館】
地址：元朗青山公路1號地下（另一隱世分店需另外預約）
營業時間：14:00-20:00（周一至五）；17:00-23:00（周六、日）
Instagram：https://www.instagram.com/littlelittle_books/
電話：9860 4079（WhatsApp）
