王丹妮盼老公「飾」做 鄭欣宜聖誕多人約

影壇新貴王丹妮大晒修長美腿現身。
影壇新貴王丹妮大晒修長美腿現身。

意大利殿堂級珠寶品牌BVLGARI前晚在中環旗艦店舉行「I Believe in Wonder」聖誕派對,鄭欣宜、王丹妮、Amanda S.與名人曾昭亮、林恬兒、林心兒、張翡玶、霍詠詩、羅欣儀及告津瑜等皆悉心打扮,以白色主題晚裝配襯名貴珠寶亮相,預演璀璨的白色聖誕。

鄭欣宜以性感低胸裙示人,她表示今年聖誕節是人生中最多人約的一次,而且是「多到要推」的狀況,她笑說:「好開心、好快樂,因為有好多人約我工作,可以有成Team人陪我一齊過聖誕。」聖誕豬籠入水,她指很開心一直獲很多客戶信任,至於可有男士約會?她笑說:「唔覺有男仔約我,有我再覆大家。」

提到各大頒獎禮將至,打入「叱咤樂壇我最喜愛的女歌手」最後5強的欣宜說:「好開心、好黐線,個電話提示番我2011年11月28日我開咗第一個演唱會,當時睇到好感觸,邊睇邊流眼淚,原來大家一直都好支持我、留意同愛我。過去呢幾星期,有唔少人投票後截圖傳畀我,令我感到好溫暖。」問到可有信心贏「最喜愛」兼冧莊「女歌手金獎」?她笑說:「有梗係唔介意,好似打牌都想冧莊,但係唔會畀自己壓力。」

「雨過會天晴」鼓勵好友

講到好友Anson Lo(盧瀚霆)近日為MIRROR再踏舞台演出時突然感觸落淚,她說:「我有問佢做乜咁眼淺,但係唔緊要,想喊就喊,我都成日喊。」對於有網民鬧爆他賣慘,欣宜說:「一定會有人鬧,我都畀人鬧大嘅。佢都好Sweet,我哋會互相傳一啲鼓勵字句畀大家,好似『雨過就會天晴』互相打氣,我哋之前音樂會,每次綵排我都爆喊,都係佢畀力量我,可能我傳染咗(喊)畀佢。」

佳節忙宣傳新片

身形高挑的王丹妮穿上5吋高跟鞋,配襯高衩長裙盡展長腿美態,加上珠光寶氣,十分高貴。她受訪時坦言很少收藏珠寶,希望老公羅孝勇完成脊醫課程會送給她:「唔係投訴,係鼓勵,畀個目標佢。」聖誕節她將要忙為新片宣傳,但重視家庭的她已預留時間與家人慶祝:「老公去咗澳洲讀書,已經有大半年冇見面,但係我哋每日有視像同聯絡,所以都係日日見。」又希望可抽空與老公去一趟小旅行。

歌手鄭欣宜開心工作不斷、荷包脹,亦希望能再奪樂壇大獎。
歌手鄭欣宜開心工作不斷、荷包脹,亦希望能再奪樂壇大獎。