雅虎香港新聞 聖誕禮物易變廢物？社企年收 5 萬套玩具贈基層家庭 聖誕新年回收量飆兩倍
【Yahoo 新聞報道】聖誕過後，不少家庭收到新簇簇卻用不着的玩具，與其變廢物送堆填區，不如為它尋找更好的歸宿。社企「玩具樂園」專門上門回收適合小學生的玩具，包括桌上遊戲、STEM玩具、LEGO等，並轉贈低收入家庭，冀所有階層的小朋友都能感受玩玩具的喜悅。創辦人郭中傑（Dave）指，聖誕及新年是每年回收的高峰期，回收量比平日飆升兩倍，更有小朋友捐贈未拆包裝花紙的聖誕禮物，「連張心意卡都仲喺度」。
文字記者：盧珮瑤
攝影記者：Oscar Liu
「玩具樂園」由Dave於2016年獨力創立，主力回收適合小學生的玩具，並轉贈予基層家庭，「我哋唔淨係做環保，希望幫埋啲家庭慳錢，做慈善嘅事」。Dave的正職是一名社工，休假時走勻全港上門回收，「我覺得反而係減壓，因為搵到個意義」。
曾買玩具成癮
Dave的一生離不開玩具。由於家境不理想，他小時候只能玩摺飛機、電筒，「睇到同學有機械人都好羨慕」。缺乏玩具的環境令Dave童年抱憾，投身社會工作後，他以金錢彌補心中缺口，「開始買返以前我無嘅玩具，放工又睇、去旅行又睇，我發覺畀呢種欲望控制咗自己，好似唔買唔得，中咗毒咁」。鍾愛模型的他曾收藏達300件玩具，「原來細個無玩具玩，大個咗個心理會想補償」。
一次搬屋令Dave重新審視家中玩具，頃刻醒覺，「發覺真係好多，多到重複買咗自己都唔知」。於是將所有玩具捐到不同社福機構，反而鬆一口氣，「我個心自由咗，嗰種自由係開心嘅，唔再畀呢樣嘢操縱住自己，可以擺多時間、精神做有意義嘅事，係釋放咗自己」。及後，他發現身邊不少親友都需要捐出玩具，故開始玩具回收工作，並申請「環保基金」經營社企，補貼倉庫租金、交通等費用。
捐贈者：未必個個咁幸福有咁多玩具
適逢聖誕假期，Dave帶著「回收三寶」到將軍澳屋苑「拆禮物」，「回收一定要有板車、紅白藍膠袋，仲有膠紙，有啲人畀一箱玩具就可以封箱」。李太與15歲兒子早在家門外等候，地上放滿大堆玩具，有桌上遊戲、書籍、爆旋陀螺，甚至仍未開封的高達模型，「買完返嚟無乜時間玩，一直擺咗喺度」。李同學指，每年執屋都向不同機構捐贈物品，今年在網上認識「玩具樂園」，決定捐出家中所有玩具，「我知未必個個咁幸福可以有咁多玩具，希望其他小朋友都可以得到呢份快樂」。
回新蒲崗倉庫途中，Dave再收到電話查詢回收事宜。他指，聖誕至新年後均屬回收高峰期，「一日要做兩、三單」，回收量比平日增加兩倍，現時一年共收到約5萬份玩具。由於聖誕有大量交換禮物活動，Dave笑言當中不少是他人所送的禮物，如化妝玩具、遙控車等，「有啲包裝紙都未拆，張心意卡都仲喺度，一睇就知係聖誕禮物」。不過，他謝絕聖誕裝飾或聖誕樹，「呢啲作用唔大，得節日有咁嘅需要，好難送到出去」。此外，移民亦令回收量增加，「試過有一單啲玩具擺滿20個紅白藍膠袋」。
益智桌遊、STEM玩具優先
Dave指，想捐贈玩具的家庭需先拍下玩具照片予他檢查，「要知道玩具嘅狀況係點，有無爛、適唔適合」。因要考慮基層家庭狀況，體積過大的他一概不收，如可供小朋友駕駛的玩具車、小型滑梯等。Dave認為玩具可啟發小朋友創意，亦有助增強社交能力，娛樂性與教育性是他選擇的考量，如桌上遊戲、STEM玩具等，「桌上遊戲小朋友可以同屋企人玩；STEM玩具都可以啟發佢哋好奇心，特別呢啲玩具都要幾百蚊，幫家庭減輕負擔」。散件LEGO則會捐贈予藝術治療團體，「佢哋會用散件LEGO叫小朋友砌自己願望，同佢哋做治療」。
Dave續指，現時大多捐贈玩具者均是中產家庭，種類與基層捐贈的亦有差異。中產家庭大多屬發展智能的玩具，如望遠鏡、顯微鏡；基層的則較大眾化，如漫畫、龍珠等，「會睇到唔同階層背後嘅教導，玩唔同玩具都會影響小朋友發展」。回收後，Dave與10多名義工將會為玩具消毒，並仔細檢查每件玩具，「我接受唔到亂七八糟咁送畀人，希望小朋友會覺得真係一份禮物」。
需要玩具的基層家庭可自行聯絡Dave，「會了解個小朋友嘅興趣先，鍾意畫畫嘅咪畀顏色筆佢」。每位小朋友可獲30至40份玩具和文具，目前「玩具樂園」一年送出的小學生玩具達3萬份。每一次送禮，漸漸成為Dave工餘拼命回收的動力，「佢哋一交收完會即刻拆嚟玩，家長會拍片話『好多謝你』」。
【玩具樂園】
查詢電話 / WhatsApp：9191 8526
更多綠色新聞🌍資訊，即睇「Yahoo可持續發展」專頁！
