雅虎香港新聞 疫下 BL 迷增加 全港唯一 BL 漫畫店盼為腐女平反：不為興趣感羞恥
【Yahoo 新聞 LGBTQ 系列報道】改編自日本電視劇的港版《大叔的愛》在港掀起一股 BL（Boy's Love）熱潮，電視框外，多位腐女三年前已早著先機，開設本港唯一 BL 漫畫店「糧食供應所」，為同好提供釋放自己的空間。店長透露，疫情雖令店舖收入減少，卻令不少人因打發時間而「入坑」接觸BL作品。兩人開漫畫店的初衷是為BL平反，希望一眾腐男腐女無須為興趣而羞恥，「希望大家可以當呢樣嘢係普通娛樂」。
文字記者：盧珮瑤
攝影記者：Davies
記者踏進「糧食供應所」，就被超過300本漫畫簇擁。書架標示了「職場」、「慎入」等漫畫類別，還有「不懂分類的好西」。若問 BL 對店長Diane和Konnie的意義，該店無線網絡密碼已提供答案：「No BL No Life」。
少少鹹 多多浪漫
BL 泛指男男戀愛作品。媒介包括漫畫、小說，廣播劇，甚至桌遊。Diane指，BL 的起源可追溯至60年代的日本，一批少女漫畫家創作當時被稱為「少年愛」的題材，如竹宮惠子的《風與木之詩》，「好多歐洲貴族風，畫風都比較似少女漫畫」。80年代則多了一批同人誌作者，涵蓋清新甜蜜到慾望感官等風格，如尾崎南的《絕愛1989》，「嗰陣故事多數係bad end，八、九十年代興畸戀題材，社會風氣亦無咁開放」。90年代BL一詞正式出現，題材、尺度越見開放。
不少港人帶有色眼鏡看BL，兩人卻覺得「有愛大過天」，「BL有好多障礙，但兩個人都仲要一齊，鹹嘅包裝最終都係追求一種終極浪漫」。
因《百變小櫻》「入坑」好友斥「變態」
20多歲的 Diane 與 Konnie 已累積十多年「腐齡」，都因《百變小櫻》「入坑」。Konnie 小四時看過《百》後，在網上看到小櫻爸爸的BL同人小說，「睇睇吓發現開始 H（性愛），好驚即刻熄咗，但成晚囉囉攣」。禁忌特別吸引，她繼續躲在被竇細閱，自此「腐眼開光」，卻遭好友斥「變態」，「我好重創係咁喊，想掉晒啲BL漫做返個『正常人』」，但始終念念不忘，繼續追看，「人哋唔理解你咪算，呢樣嘢令我開心」。
Konnie也會看異性戀漫畫，但當中有太多性別定型，「成日有一見鍾情、女仔要同男人生仔咁」。BL題材則更多元，如女裝攻、男士亦會懷孕的世界觀（ABO）等，顛覆傳統性別概念。對Diane而言，BL是接觸性文化的空間，「亞洲女仔好容易raised to be afraid of sex，但睇BL我可以appreciate呢件事」。同志朋友亦更願意向她「出櫃」，「BL係一個契機去了解多啲LGBT文化，面對緊咩問題，我可以點樣幫到佢哋」。
「希望匿喺被竇睇 BL 嘅小朋友唔使再驚」
Diane小時候到信和漫畫店租BL漫畫，「一開始會覺得自己做錯事，一行埋去就會有人望住你」。故此她與同好開店，「希望可以令到仲匿喺被竇睇緊BL嘅小朋友唔使再驚，想話畀人知睇BL唔一定係『電車男』咁」。該店2019年初於尖沙咀開業，前年小舖換大舖搬至旺角，共有5位店長，以「小天使」稱呼客人，「唔想用先生小姐嘅定型去稱呼，嚟得嘅都係天使般嘅好人」。店中客群由7歲到60多歲，「見過父母上嚟幫個女買，又會一齊睇，親子關係反而close咗」。
Konnie續指，疫情雖令店舖收入減少，但讀者仍會在網店買書，「無睇開BL嘅人都會問有咩推介，因為屈得喺屋企太耐，反而多咗人睇BL」。兩人指香港BL文化比日、韓、泰落後，希望本地有更多原創作品，她們亦有創作短片和漫畫。各地BL作品都富本土特色，她們的短片故事包括咖啡師與打工仔的愛情故事，取景自觀塘，「有得做就盡做，希望大家可以當呢樣嘢係普通娛樂，你鍾意做gym、整甜品，我鍾意睇BL都係一樣」。
