疫情打亂計劃錯有錯著 ViuTV阿妹岑樂怡變環保KOL

舊年唔少人嘅生活都因為一場疫症而出現改變，對藝人嚟講就更加明顯，冇show開冇工開冇得北上，唔轉型唔掂。ViuTV藝人阿妹（岑樂怡）正正係其中一個，不過唔係為咗搵食咁簡單。

入行7年嘅阿妹喺Viu做主持為主，舊年喺鄭中基主演嘅劇集《暖男爸爸》飾演幼稚園老師Carmen令觀眾刮目相看。阿妹本來有旅遊節目要拍，又計劃好去美國讀書，因為疫情全盤計劃唔同晒！

舊年年頭阿妹喺尼泊爾拍緊旅遊節目，由於新冠疫情全球大流行，尼泊爾政府宣布鎖國，阿妹同攝製隊趕得切喺限期前返香港，佢仲自行訂酒店自我隔離14日。「閉關」期間，阿妹睇咗本關於環保嘅書，啟發佢拍片做Youtuber嘅念頭。

阿妹喺Youtube開頻道「岑樂怡和你Green」，一手一腳搞掂搵料寫稿拍片剪接，題材多數係分享環保生活方式，例如減少使用塑膠等嘅小貼士。本來佢都擔心呢個話題會冇人睇，但係又覺得「走塑」並非想像中難，既然冇人講解就不如自己嚟。開台一年半，而家有近5千訂閱，成績算係唔錯。阿妹亦會睇留言同網友交流，從中搵到新題材。阿妹又會寫專欄，以及同多個環保團體合作，以唔同渠道推廣環保資訊。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！