So Ching嘆與阿Mo冇選擇 舞蹈員群起促主辦方交代

人氣男團MIRROR紅館演唱會發生墮屏意外後，受重傷嘅舞蹈員李啟言（阿Mo）仍然留醫，雖然Mo父透露仔仔少於4星期便可除掉頸箍及不倚靠呼吸機，其女友、COLLAR成員So Ching都係未放心，堅持日日去探阿Mo，陪伴佢面對各種治療。曾被爆着男友衣服解思念之苦嘅So Ching，今日（29日）凌晨再發文抒發對男友嘅思念同祝福，並於社交平台發文：「兩個月喇，我望住你，我知道我哋冇其他選擇，你一定會好番！」繼續為阿Mo打氣，堅信男友一定會康復！

另外，多位有份參與當日表演嘅舞蹈員，均紛紛發文指已對紅館天花感害怕，而且以後跳舞都唔會好似以前咁享受，反而係會不停擔天望地，深怕天花會有嘢跌落嚟，並發文指大家都等待主辦方一個交代，眾人更上載多張昔日同阿Mo嘅合照，以表思念之情。

舞蹈員Canny透露與阿Mo識於微時，當晚亦目睹意外經過，心痛阿Mo家人和女友So Ching：「一聲巨響，我回望，看到我身後的好朋友倒下了，躺下來了，動不了……這個惡夢為我帶來了一個揮之不去的陰影……難以想像他本人、家人、女朋友，內心承受的一定比我煎熬千倍萬倍。設身處地去想，身體髮膚受之父母，看到李媽媽很努力面對，我也十分不忍心。而每天頻頻撲撲照顧他日常的So Ching，這個二十幾歲、本是對生活充滿熱誠和抱有夢想的小女孩，我更是深感愧疚。」

舞蹈員Zisac則指：「啟言身體需要好多時間，咁調查同交代需要幾多時間？我哋等緊一份報告，等緊一個交代。」