盼賀歲電影百花齊放 張敬軒約王菀之開枱 打定輸數

王菀之被奶奶訓練成「雀后」,張敬軒自愧不如。
王菀之被奶奶訓練成「雀后」,張敬軒自愧不如。

張敬軒與老友王菀之攜手合作強攻今年賀歲檔期,同聲期望百花齊放,揚言會穿戲服捧對手場,知己知彼!軒仔更預告新年已約定劇組打雀局,惟牌章未及技術高超的王菀之,故打定輸數!

張敬軒、王菀之(Ivana)、魏浚笙(Jeffrey)、楊天宇、張明偉等昨日出席英皇賀歲片《超神經械劫案下》宣傳,吸引逾300市民圍觀,逼爆商場,席間一眾演員更與粉絲互動玩遊戲,場面熱鬧!

邀甄子丹捧場

談到新年將忙於為新片宣傳,軒仔透露已相約劇組麻雀耍樂兼拜年,還爆料指Ivana牌章勁唔夠打,Ivana表示:「係奶奶訓練有素,之前做慣魚腩,我唔想㗎!但冇辦法控制到。」談到於網上綜藝節目《軒公敲碗》與李璨琛囡囡李元元「談情」,沒料被對方一句KO,軒仔對此說:「第一次湊BB,佢轉數超快,真係嚇親,嗰句我真係毫無招架之力,同埋佢都係性格巨星。」

對於今年賀歲檔將與甄子丹的《天龍八部之喬峰傳》及王丹妮、廖子妤等演出的《毒舌大狀》對撼,軒仔與Ivana希望影壇百花齊放,Ivana說:「或者我哋着住戲服去戲院捧其他賀歲片場,之後再邀請番佢哋睇呢套戲,其實我都期待甄子丹睇我同軒仔嘅打戲,或者佢都會好滿意。」提到樂壇教父Uncle Ray離世,軒仔直言是娛樂圈重大損失,Ivana則表示會為Uncle Ray家人及愛錫他的人祈禱。

魏浚笙要成熟啲

而Jeffrey於片中與軒仔及白只有裸跑戲,原來該場戲分開3個月份拍攝:「10月、11月同12月咁拍,身形都Keep咗3次,所以新年要食好啲。(喺音樂同電影分別騷肌,會唔會拍個全裸寫真?)唔好啦!依家開始要成熟啲!同埋嚟緊想集中音樂同電影多啲!」至於有份參與該片的洪嘉豪,卻於活動舉行了個半小時才姍姍來遲,他表示因工作關係遲到,軒仔即笑着寸他:「我哋嘅主角終於到場!」令洪嘉豪哭笑不得。

張敬軒為新片磨拳擦掌,率領眾演員商場造勢大派心心。
張敬軒為新片磨拳擦掌,率領眾演員商場造勢大派心心。