盼開足球酒吧 親自調酒 Kylie C.行桃花運 睇啱就上

人氣KOL兼新一代「講波女神」Kylie C.，盼兔年事業大躍進，能參與更多綜藝節目甚至拍劇，主持口才再升呢，又希望早日開足球酒吧過睇波癮。她說今年是她的正桃花年，雖不抗拒緣分到來，但堅持寧缺勿濫。

Kylie C.前年加盟「美容教主」唐安麒ACE娛樂旗下正式入行後，未幾成為人氣極高的KOL及模特兒，睇波資歷逾十年的她，更善用豐富的足球知識，曾主持世界盃等講波節目，成為新一代「講波女神」！她說新年願望是工作不停，希望參與更多綜藝節目，並計劃報讀戲劇課程，盼學以致用，他日可拍劇或拍電影，更說主持的經驗獲益良多：「本來對鏡頭恐懼，之後開始習慣，識得搵方法減低緊張，強尼大哥真係好犀利，反應快又幽默，好有急才，係我學習對象。」她續說也希望一圓開足球酒吧的心願：「一直好想開足球酒吧可以同球迷交流，我打算讀埋個調酒師牌，為自己嘅酒吧炮製signature cocktail。」

去年和拍拖8年的男友分手的她，自言肖鼠今年有正桃花運，但只會抱隨緣及寧缺勿濫的態度：「今年我都26歲，覺得自己唔大唔細咁，搵男朋友比較難，我希望搵到心地善良、脾氣唔暴躁、好愛我嘅男仔，因為我係幾受愛情影響，所以希望一段關係能夠令雙方進步。如果合眼緣，我會採取主動，我好怕啲男仔太主動，我會好驚好有壓力，會即刻行開。」

拜年被催婚見招拆招

每逢農曆新年，Kylie C.會炮製代表財源滾滾的糖環，更會遵守年初一不洗頭的習俗，對於很多人在拜年時會遇到親戚問何時結婚或生仔等問題，她認為不難應付：「如果問幾時結婚，你可以話：『你儲咗人情未先？』被追問生BB，可以答：『我打算生一隊足球隊，你係咪幫我湊先？我仲打算送成隊去阿仙奴青訓！』哈哈！過年最緊要開心，唔使咁認真！」