秘密簽唱片公司 袁偉豪踩過界做創作歌手

藝人袁偉豪向來喜歡音樂，如今更演而優則唱，秘密簽了唱片公司，他會推出多首自己創作的新歌，更推出EP名正言順做創作歌手。

袁偉豪（Ben）最近狀態大勇，繼日前為無綫慈善節目與Super Tiger成員又跳又唱，表現備受讚賞外，翌日他又即為廣告進行拍攝，穿着西裝上陣，有型又靚仔，精神奕奕。

目標今年出EP

Ben向來諗頭多多，暫時未有劇在身的他原來密謀大計，更已暗地裏簽約唱片公司，下月會正式入錄音室錄歌，更會親自為新歌作曲、填詞，實行做唱作歌手，以實力取勝，目標是今年推出一張EP碟。其實他自小就喜歡音樂，一直有彈結他，2001年他與柯有倫及陳國坤更組樂隊，交流音樂心得。

他受訪時說：「音樂其實一路都做緊，今個月會錄住兩首歌先，下半年會期待再有首新歌，希望到時出到EP，幕後方面都籌備緊拍攝工作。」他坦言親手包辦3首歌的作曲、監製及編曲工作，當中有一首更由他填詞，MV都是他執導。問到是否現時不拍劇全力做歌？他說：「有好嘅劇本都會拍，依家正好有時間做歌，會一次過推出。（會唔會作埋畀公司其他歌手？）其實我都有啲歌係可以畀其他歌手唱，都有個心想做多啲音樂出嚟娛樂大家。」