【移民英國】搵工由零開始從何入手?咩行業缺人?邊區人工高?
移民係一件人生大事,相信佔咗99%想移民嘅人最大阻力就係「去到點搵食?」無錯,縱然你而家喺香港收入不俗有車有樓,覺得有能力移民可以負擔到衣食住行等費用,不過長遠計最大問題就係「搵食」。要從零開始於人生路不熟嘅地方搵工,談何容易?今日為大家提供幾大貼士,幫你成功搵工啦!
熟行頭 邊行最缺人?
要搵工,最緊要當然了解當地行頭,其實英國政府定期於其官網上列出全國最缺人嘅工種(Shortage Occupation List),如果閣下份工係列表(按這裡)之中,搵工自然相對較易,以下係其中部分工作:
醫生
獸醫
護士
語言治療師
建築師
社工
藥劑師
舞蹈員/排舞師
圖像設計師
心理學家
生物化學家
物理科學家
社交及人類學家
電力工程師
電子工程師
科技商業分析師
程式及軟件工程師
網頁設計及發展
收入最高城市 倫敦排第一
睇完工種之後,當然要了解你自己心水居住城市嘅薪金指數,根據BBC報道,英國平均周薪為539英鎊,全國只有15個地區/城市薪金比呢個平均數高。排名第一當然係倫敦,平均周薪為727英鎊;其次6個城市都係東南部城市包括雷丁(Reading)、克勞利(Crawley)、米爾頓凱恩斯(Milton Keynes)、劍橋(Cambridge)、斯勞(Slough)、牛津(Oxford),全部周薪都有600英鎊或以上。另外次一級嘅城市包括愛丁堡(Edinburgh)、鴨巴甸(Aberdeen)、打吡(Derby),周薪都接近600英鎊。至於最低薪嘅地區/城市,唔好以為係偏遠郊區,出奇地居然係接近倫敦嘅沿海地區濱海紹森德(Southend-on-Sea),周薪只有413英鎊,其他比較低薪嘅都位於西北部及中部,包括哈德斯菲爾德(Huddersfield)、伯肯黑德(Birkenhead)及衛根(Wigan)。
香港搵工用網頁 當地搵工靠中介
唔少人覺得要喺英國工作幾乎都要去到當地再搵,其實不然,喺香港有唔少搵工網站其實都有海外搵工服務,大家只要照常提交CV等資料(不過記得文法要轉回英式),同樣可以申請職位空缺,有部分公司更可以用視像通話去見工。最有效率當然係於當地搵工,通常都依靠當地中介公司,最著名包括People First、ABL Recruitment、Office Angel、Michael Page、Randstad等,通常流程係你提供個人資料及理想工種、薪金之後,中介公司會主動聯絡你,有可能邀請你上中介公司見面作深入了解對談,一旦有合適工作就會介紹。提醒一句,英國公司請人程序繁複,一份工由第一次見工至入職隨時要3至6個月時間,真係要有心理準備慢慢等。
小型招聘會有奇效?
香港都定時定候有大型招聘會,原來喺英國就比較多小型招聘會,好多都係圍繞於一個社區之中嘅工作,不過根據好多成功搵工嘅移民朋友話,出席呢啲小型招聘會有時未必因為見到有心水工作而去,最大作用係要認識多啲人,尤其同社區嘅朋友,對他日搵工有莫大幫助,建立到自己嘅人際網絡,之後有合適工作都會主動介紹畀你,自然比其他人更勝一籌。
總結:有心理準備要減人工
所有移民人士其實都應該要有心理準備,就係普遍英國人工都比香港低,例如護士人工只有香港嘅一半,因為英國薪俸稅極高,所以稅後收入幾乎一定比香港同工種少;但當然衣食住行各種消費比香港低,尤其係「住」,所以其實一樣夠用呢!
更多相關文章