【移民英國】英國倫敦最佳預備學校 入名牌中學前必讀？

自從移民英國成為熱門話題之後，先前為大家介紹過2020英國中學排名，今日就會介紹小學。香港好多家長會讓小朋友入幼稚園前讀N班，即預備班Pre-Nursery，但原來英國嘅私立小學又有「預備學校」（Preparatory School）之稱，為進入理想中學打好基礎，今日會大家介紹英國倫敦最著名幾間私立預備學校，可以話係進入名牌中學、大學前嘅最佳搖籃。

點解要揀私立小學？

對於移民過英國嘅小朋友，好多都會選擇私立小學，點解？首先私立小學多數可以寄宿，解決住宿方面問題。因為怕跟唔上其他英國學生嘅進度，私立小學多數會由小班教學，一班唔多於10人，會學習英語及另一種外語。教育方面，私立中學注重均衡發展，提供大量可選擇嘅課外活動，可以預早發掘子女興趣，對日後升學大有幫助；而且私立小學每年平均上堂時間比公立小學多100小時，小朋友黃金學習年齡時能夠比其人學到更多知識，自然勝人一籌。

必修法語及西班牙語：Bute House School

位於倫敦市區Hammersimth嘅著名女校，同時被稱為倫敦最頂尖預備學校。平均有近40%畢業生成功入讀St Paul’s Girls’ School，即全國排名第一嘅中學，極為驚人。學生必須學習法語及西班牙語，另外要學古代史等比較冷門學科。同時提供極多種課外活動包括體操、管弦樂、電子結他、馬術等。校長強調學校唔希望家長「求學只是求分數」，其敎育理念為「尊重自我價值，肯定自己成績，每人都可以做自己」。由於競爭激烈，要提前一年報名參加入學考試。

學費（以一個學期計算，全年共三個學期，下同）：約4,700英鎊

網站：按這裡

與時並進科技教育：Falkner House School

超過半世紀歷史傳統女校，不過2017年開始招收男生。位於倫敦市區南肯辛頓，距離市中心僅4公里，可以話係黃金地段。提起該學校，幾乎一致認同其師資十分優秀，校內老師及學生打成一片，關係融洽。雖然學校校園非常充滿古典感，不過教育方面就十分與時並進，上堂都用上iPad及iMac，喺呢個著重Steam教學年代可以話非常實用。學業成績方面，約30%畢業生可以成功就讀頂尖中學例如Wycombe Abbey、Downe House等。要注意報讀Falkner House係需要提前兩年申請，請及早準備呢。

學費：約7,000英鎊

網站：按這裡

設多項體育獎學金：Newton Prep School

位於倫敦南部貝特西公園嘅男女混校，於1991年建校，成校不足30年就已經成為全國頂尖預備學校之一，憑藉校內多項體育獎學金，吸引大量體育天資豐富嘅小朋友報讀。眾多體育活動包括芭蕾舞、柔道、劍擊、籃球、網球、曲棍球等，於學界屢獲佳績，唔少表現出色嘅學生都因為得到獎學金而成功升讀其他著名私立中學。體育之外學術亦同樣出色，課程非常完善，包括數學、語文、歷史、地理等都有得修讀。自問自己小朋友比較好動而且體育神經出色的話，就不妨考慮Newton Prep School喇。

學費：約6,800英鎊

網站：按這裡

公主王子做同學：Thomas’s Battersea

被稱為皇室專用預備學校，亦同時設有幼稚園部，因為唔少皇室成員都曾就讀，包括第四代皇室繼承人喬治王子及夏洛特公主都正就讀。其審核非常嚴格，要報讀必須於3歲時就接受測驗。學校標榜教育「知識及交際能力」，為學生提供多種課程培養社交能力及禮儀。學校深信人際交流有時比個人能力重要，所以只要擁有出色人際關係技巧及EQ，日後無論工作定生活都可以勝人一籌。其次係學校從學生8歲開始提供每年短途旅行，從歷史文化之旅以至攀山涉水考察團，可謂貫徹讀萬卷書不如行萬里路。

學費：約6,700英鎊

網站：按這裡